Եգիպտական ինքնաթիռի առևանգման պատմության բարեհաջող ավարտը հնարավոր է դարձել առաջին հերթին օդանավի անձնակազմի խելամիտ գործողությունների շնորհիվ, մասնավորապես՝ ավագ բորտուղեկցորդուհի Յասին Սաբլի։ Նա բանակցություններ է վարել EgyptAir ավիաընկերության A320 ինքնաթիռն առևանգողի հետ: Այս մասին պատմել են ուղևորները Կահիրեի օդանավակայանում` Կիպրոսից վերադառնալուց հետո, փոխանցում է ՏԱՍՍ գործակալությունը:
Հիշեցնենք, որ երեկ առևանգվել էր Ալեքսանդրիա-Կահիրե չվերթն իրականացնող ուղևորատար ինքնաթիռը։ Այն վայրէջք էր կատարել Կիպրոսի Լառնակայի օդանավակայանում։
Հենց բորտուղեկցորդուհին է համոզել առևանգիչ Սեյֆ ադ- Դին Մուսթաֆային բաց թողնել ուղևորների մեծ մասին, առաջին հերթին՝ կանանց և երեխաներին, և ինքնակամ հանձնվել իշխանություններին։
Ինչպես եգիպտական լրատվամիջոցներին պատմել է անձամբ հերոսուհին, հանցագործը սպառնացել է գործի դնել պայթուցիկը, եթե ինքնաթիռը մոտենա Կահիրեին:
Օդանավի հրամանատար Ամր Գամալի խոսքով՝ առևանգման մասին հայտնի է դարձել գրառումից, որն օդաչուներին է փոխանցել ուղևորներից մեկը և որում եղել է ինքնաթիռը պայթեցնելու սպառնալիք, եթե չփոփոխվի երթուղին: Գեմալի խոսքով՝ տղամարդը պահանջել է մեկնել 3 ուղղություններով` Կիպրոս, Թուրքիա կամ Հունաստան:
«Վառելիքը կբավականացներ միայն մինչև Կիպրոս, ինչի մասին էլ ես նրան ասացի: Ամեն դեպքում, եթե նույնիսկ առևանգողը պնդեր, ես Թուրքիա չէի թռչի»,- պատմել է օդաչուն:
Որևէ կոնկրետ պահանջ եգիպտացին չի ներկայացրել: Երկրորդ օդաչուն պատմել է, որ անձնակազմը փորձել է առավելագույնս զգույշ լինել հանցագործի հետ, նրան թեյ, սուրճ են հյուրասիրել, ամեն կերպ փորձել են հանգստացնել։
