Ֆրանսիայի կանանց իրավունքների հարցերով նախարարը քննադատության է ենթարկվել այն պատճառով, որ հիջաբով մուսուլման կանանց համեմատել է «ստրկության մեջ գտնվող նեգրերի» հետ, գրում է BBC-ն։
Լորանս Ռոսինյոլը հեռուստատեսությամբ անպատասխանատու է անվանել նաև նորաձև բրենդների վարքը, որոնք հիջաբ են արտադրում։
Նրա խոսքով՝ նորաձևությունն անհրաժեշտ է, որ կանանց ազատություն տան, այլ ոչ թե «համագործակցեն բռնապետության հետ, որը ձգտում է ստիպել կանանց թաքնվել»:
Ավելի ուշ նա խոստովանել է, որ «նեգր» բառն օգտագործելը սխալ է եղել, սակայն ընդգծել է, որ օգտագործել է այն` որպես հղում փիլիսոփա Շառլ Մոնտեսկյոյի «Նեգրերի ստրկության մասին» աշխատությանը։
Հազարավոր մարդիկ ստորագրել են նախարարի հրաժարականի պահանջով խնդրագիրը:
Հիջաբներն արդեն երկար տարիներ բուռն վեճեր են առաջացնում Ֆրանսիայում, այդ թվում` պետական մակարդակով: