Եվրասիական տնտեսական միությունը զուտ տնտեսական նախագիծ է, ԽՍՀՄ-ի վերստեղծման մասին խոսք լինել չի կարող, հայտնել է Ղազախստանի նախագահ Նուրսուլթան Նազարբաևը:
Ղազախստանի նախագահը գտնվում է Վաշինգտոնում, որտեղ մասնակցում է Միջուկային անվտանգության գագաթնաժողովին, փոխանցում է РИА Новости-ն:
Պետության ղեկավարի մամուլի ծառայության տեղեկություններով՝ Նազարբաևը հանդիպում է ունեցել ԱՄՆ-ի հասարակական և քաղաքական գործիչների հետ: Նա նշել է, որ ԵՏՄ-ն տնտեսական միություն է` ապրանքների, ծառայությունների, կապիտալի, աշխատանքային ռեսուրսների վերաբերյալ միասնական կանոններով:
«Կցանկանայի ընդգծել, որ ԽՍՀՄ-ի վերստեղծման մասին խոսք լինել չի կարող: Պետք է վերացնել այդ «սառը պատերազմի» կարծրատիպերը: Նրանք խանգարում են մեզ նայել ապագային: ԵՏՄ-ն զուտ տնտեսական նախագիծ է»,- ասել է Նազարբաևը։