Քաղաքագետ Հրանտ Մելիք Շահնազարյանը գտնում է, որ Ադրբեջանը հրադադարի միջոցով կարողացավ կասեցնել հայկական հակագրոհը: Լրագրողների հետ հանդիպման ժամանակ նա ասաց, որ հայկական կողմը պետք է ամեն ինչ անի, որ հանկարծ մոռացության չմատնվի Ադրբեջանի ագրեսիան ու անհաջողությունը, և բանակցությունները չընթանան նախկինի պես:
Ինչ վերաբերում է Ռուսաստանի այն հայտարարությանը, որ շարունակելու են Ադրբեջանին զենք վաճառել, քանի որ այդպես նաև վերահսկողություն է ապահովվում, Հրանտ Մելիք-Շահնազարյանն ասաց, որ ՌԴ-ն, այնուամենայնիվ չկարողացավ վերահսկել և ագրեսիան տեղի ունեցավ:
«Պաշտոնական Երևանը դժգոհ է Մոսկվայի դիրքորոշումից: Տառակերություն է ասել, որ ՀՀ-ի վրա հարձակում չի եղել, այլ եղել է ԼՂ-ի վրա: Միջազգային հանրության արձագանքներն էլ պայմանավորված են իրենց իսկ շահերով, որոնք միշտ չէ, որ համընկնում են հայկական կողմի շահերի հետ: Ռուսաստանին պարտադրելու ռեսուրս, որ Ադրբեջանին զենք չվաճառի, Հայաստանը չունի»,- ասաց նա և նշեց, որ Ռուսաստանը շատ լուրջ հետաքրքրված է Ադրբեջանին իր ազդեցության գոտի ներքաշելով:
Քաղաքագետը բանակցություններով հարցի կարգավորման հնարավորություն չի տեսնում, այլ գտնում է, որ Ադրբեջանին պետք է պարտադրել խաղաղություն:
«Ադրբեջանը իսկապես դժվար վիճակում է հայտնվել: Հիմա այս պահին գտնում եմ, որ գործում է զսպման մեխանիզմ, լուրջ ճնշում կա երկու կողմերի վրա էլ»,- ասաց նա: