«Հայաստանի զարգացման նախաձեռնություններ» (IDeA) հիմնադրամը շնորհակալություն է հայտնում բոլոր անձանց եւ կազմակերպություններին՝ Aurora Prize for Awakening Humanity նախաձեռնությանը աջակցելու համար:
Հիմնադրամն առանձնահատուկ երախտագիտություն է հայտնում մրցանակաբաշխության արարողության գործընկերներին եւ, հատկապես` «ARARAT» հայկական լեգենդար կոնյակի արտադրող Երեւանի կոնյակի գործարանին, Հայաստանի հեռահաղորդակցության առաջատար օպերատոր ՎիվաՍել-ՄՏՍ, Panarmenian Media Group ընկերություններին:
Մենք շնորհակալ ենք բոլոր այն կազմակերպություններին, որոնք մեզ հետ են եւ կիսում են նախաձեռնության գաղափարն ու արժեքները: Աշխարhում կատարվող իրադարձությունները ցույց են տալիս, որ մարդասիրության հետ կապված խնդիրներն այսօր եւս հրատապ են, ինչպես հարյուր տարի առաջ»,-ասել է IDeA հիմնադրամի գլխավոր տնօրեն Էդգար Մանուկյանը:
«Հարյուր տարի անց Հայոց ցեղասպանությունը վերապրածների անունից իրենց փրկողներին երախտագիտություն հայտնելու եւ նոր գլոբալ նախաձեռնության սկիզբ դնելու գաղափարն ինքնին բացառիկ է: Մեզ համար անչափ հաճելի է սեփական ավանդն ունենալ այդ նախաձեռնության իրականացման գործում»,- ասել է Երեւանի կոնյակի գործարանի գործադիր տնօրեն Իգոր Առաքելյանը:
««Ավրորա» մրցանակը կոչ է՝ ուղղված անհատի կամքն արթնացնելուն՝ մղելով նրան գործելու իբրև առաքելությամբ Մարդ, ով կյանքեր փրկելու համար պատրաստ է տանել զրկանքները, արհամարհել վախը, մինչև անգամ՝ վտանգել սեփական կյանքը»,- նշել է ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանը:
«Մեզ համար պատիվ է ներկայանալ որպես Ավրորա մրցանակի գլխավոր մեդիա-գործընկեր: Հույս ունեմ, որ 100LIVES/Ավրորա նախաձեռնության շնորհիվ աշխարհը մի քիչ ավելի զգոն կդառնա, մարդիկ էլ՝ ավելի մարդասեր», - նշել է Panarmenian Media Group-ի Խորհրդի նախագահ Արմեն Արզումանյանը:
Aurora Prize for Awakening Humanity-ի մրցանակաբաշխությունը տեղի կունենա ապրիլի 24-ին, Երեւանում: