Ամերիկյան Google որոնողական համակարգը ներկայացրել է սեփական օրացույցի թարմացված տարբերակը, որը ստացել է Goals (նպատակներ) անվանումը: Ինչպես նշում է gazeta.ru-ն, «խելացի» օրացույցը կարողանում է օգտատիրոջ օրակարգում ինքնուրույն ժամանակ գտնել որևէ օգտակար բանով զբաղվելու համար։
Օրինակ` օգտատերը կարող է հանձնարարել Goals-ին իր օրակարգում ազատ ժամանակ գտնել մարզասրահ այցելելու համար: Միևնույն ժամանակ, նա կարող է նշել, թե օրվա որ ժամին է ուզում գնալ մարզասրահ և որքան երկար է մտադիր հաճախել այնտեղ։ Այնուհետև Goals-ը վերլուծում է օգտատիրոջ օրակարգն ու ընտրում է նրա նշած զբաղմունքի համար ամենաօպտիմալ ժամանակը:
Աղբյուրը հավելում է, որ սկզբի համար օգտատերերը հնարավորություն կունենան Goals-ի միջոցով ժամանակ գտնել սպորտով զբաղվելու, որևէ նոր լեզու ուսումնասիրելու, երաժշտական գործիք նվագել սովորելու համար ու նմանատիպ այլ զբաղմունքների համար։