Վենեսուելայի իշխանություններն ազդարարել են ամենօրյա կարգով չորս ժամ էլեկտրականության անջատման մասին: Անջատումները կսկսվեն հաջորդ շաբաթ և 40 օր կտևեն, հաղորդում է BBC-ի ռուսական ծառայությունը:
Անջատումների պատճառը երկարատև երաշտն է: Դրա պատճառով երկրի հիդրոէլեկտրակայանները չեն կարող աշխատել ողջ հզորությամբ: Չնայած Վենեսուելան նավթի մեծ պաշարներ ունի, այն իր էլեկտրաէներգիայի մեծ մասը ստանում է ՀԷԿ-երից:
Ավելի վաղ չորեքշաբթի օրը երկրում ամենախոշոր գարեջրի գործարանը հայտարարել է, որ ֆինանսական ճգնաժամի պատճառով ստիպված կլինի մեկ շաբաթից դադարեցնել աշխատանքը:
Այս ամենը տեղի է ունենում նավթի ցածր գների տնտեսական աճի կրճատման ֆոնին: Նավթի արտահանումը կազմում է Վենեսուելայի բյուջեի մեծ մասը և գների անկումը վատ է անդրադառնում տնտեսության վրա: