«Եվրատեսիլ-2016» երգի միջազգային մրցույթի հաղթող, Ուկրաինան ներկայացնող երգչուհի Ջամալային խորհուրդ են տվել փոխել քաղաքացիությունն ու վերադառնալ պատմական հայրենիք։
Ինչպես տեղեկացնում է ТАСС-ը, այդ մասին հայտարարել է Ղրիմի փոխվարչապետ Գեորգի Մուրադովը։
«Սա նրա հայրենիքն է»,-ընդգծել է Մուրադովը։
Նրա խոսքով՝ Ջամալային մնացել է փոքր միջոցառումներ իրականացնել՝ քաղաքացիությունը փոխելու հետ կապված, և վերադառնալ հայրենիք։
«Արտաքսման ձգձգված թեման պետք է ավարտվի, պետք է վերադառնալ։ Մենք միշտ ուրախ ենք նրան, շնորհավորում ենք ու կարծում, որ նրա օգտին տրված ռուսական քվեների մեջ եղել են նաև Ղրիմի թաթարների ձայները, որոնք այժմ մեզ մոտ՝ Ղրիմում են ապրում»,- հաղորդել է փոխվարչապետը։
Ջամալայի իրական անունը Սուսաննա Ջամալադինովա է։ Նրա հայրը Ղրիմի թաթար է՝ Ալիմ Ջամալադինով, մայրը՝ Գալինա Թումասովան, հայուհի է։ Երգչուհու մանկությունն անցել է Ղրիմում։
«Եվրատեսիլ-2016» երգի միջազգային մրցույթում Հայաստանը ներկայացրել է Իվետա Մուկուչյանը՝ 249 միավորով զբաղեցնելով 7-րդ տեղը։
