Ռուսաստանը չի պլանավորում Իրանին տանկեր և կործանիչներ մատակարարել: Այս մասին հայտարարել է Ռազմատեխնիկական համագործակցության դաշնային ծառայության ղեկավար Ալեքսանդր Ֆոմինը:
«Մենք չենք պատրաստվում մատակարարել, քանի որ այդ պլատֆորմներն ընկնում են ՄԱԿ-ի պատժամիջոցների տակ»,- ասել է նա՝ պատասխանելով Ինտերֆաքսի հարցին:
Ավելի վաղ Իրանի ցամաքային զորքերի հրամանատար, գեներալ Ահմադ Ռեզա Պուրդաստանը հաղորդել էր, որ Իրանը մտադիր է Ռուսաստանից ձեռք բերել Т-90 տանկեր: Նշվում էր, որ Թեհրանը մտադիր է գնել տանկեր միայն արտադրության տեխնոլոգիաների հաղորդման դեպքում, քանի որ երկիրը հասել է արտադրական բարձր մակարդակի և հետագայում նման տեխնիկա ձեռք բերելու անհրաժեշտություն չկա:
Հիշեցնենք, որ 2000-ական թվականների երկրորդ կեսին ՄԱԿ-ի ԱԽ-ն պատժամիջոցներ էր սահմանել Թեհրանի նկատմամբ, որոնք բացառում էին մինչև 2020թ-ն Իրանին հարվածային զենքերի մատակարարումն՝ առանց հատուկ թույլտվության: