Թուրքիայի իշխանությունները շատ ավելի մեծ եռանդով ցուցադրական դատավարություններ են անցկացնում լրագրողների, քան դրամաշորթների նկատմամբ: РИА Новости-ի փոխանցմամբ` Sputnik գործակալությունն է հայտնել թուրք լրագրողուհի Արզու Յըլդըզը:
Այնուամենայնիվ Յըլդըզը համոզված է, որ արդարադատության համակարգը Թուրքիայում վաղ թե ուշ կսկսի գործել, թեև այժմ գտնվում է կաթվածահար վիճակում:
«Նրանք, ովքեր կալանքի տակ են առնում լրագրողներին, ձերբակալում են դատավորներին, դատախազներին, մեղադրում են ոստիկաններին դավաճանության մեջ, բոլոր այդ մարդիկ չեն կարողանա իրենց արարքներով քողարկել իրենց իսկ հանցագործությունները: Վաղ թե ուշ նրանք պատասխանատվություն կկրեն», - ասել է լրագրողուհին:
Թուրքական դատարանը մայիսի 20-ին Արզու Յըլդըզին դատապարտել է մեկ տարի, 8 ամսվա ազատազրկման և զրկել ծնողական իրավունքներից՝ թուրքական հատուկ ծառայությունների բեռնատարների հետախուզման տեսանյութերը հրապարակելու համար: Բեռնատարները հավանաբար զենք էին տանում սիրիացի գրոհայիններին: