Համաներման արժանացած ուկրաինուհի օդաչու Նադեժդա Սավչենկոն, Կիև ժամանելուն պես, ջերմ ընդունելության է արժանացել հայրենակիցների և Ուկրաինայի նախագահ Պյոտր Պորոշենկոյի կողմից:
Ինչպես տեղեկացնում է BBC-ն, Պորոշենկոն Սավչենկոյին «Ուկրաինայի հերոսի» աստղ է հանձնել «արիություն ցուցաբերելու և Ուկրաինայի ժողովրդին զոհաբերությամբ ծառայելու համար»:
Ինչպես արդեն հաղորդվել էր, իր ելույթի ժամանակ Պորոշենկոն հայտարարել է, որ ինչպես հաջողվել է վերադարձնել Սավչենկոյին, Ուկրաինան կվերադարձնի նաև Դոնբասն ու Ղրիմը:
Նադեժդա Սավչենկոն, իր հերթին, հայտարարել է, որ պատրաստ է կրկին մեկնել մարտի և կզբաղվի գերիության մեջ հայտնված ուկրաինացի զինվորականների ազատագրմամբ:
Հիշեցնենք, որ Սավչենկոյին ռուսական դատարանը դատապարտել էր 22 տարվա ազատազրկման Դոնբասում ռուս լրագրողների սպանության մեղադրանքով: Իսկ այսօր ավելի վաղ ՌԴ նախագահ Վլադիմիր Պուտինը համաներում էր շնորհել Սավչենկոյին: