«Բարգավաճ Հայաստան» խմբակցության պատգամավոր Լյովա Խաչատրյանը Tert.am-ի հետ զրույցում անդրադարձել է գյուղատնտեսության զարգացման խնդիրներին: «Մենք պետք գումար ներդնենք գյուղատնտեսության մեջ, որ գյուղատնտեսությունը տա արդյունք»,-ասաց նա:
Անդրադառնալով գյուղացիական տնտեսություններին տրամադրվող վարկերին՝ նա ասաց, որ դրանք շատ բարձր տոկոսադրույքներով են տրամադրվում և ասաց, որ առաջարկում է առանց տոկոսադրույքի վարկեր տրամադրվեն: «Այդ ի՞նչ պետք է աշխատի գյուղացին, որ այդքանը վարկերը փակի, մի քիչ էլ իրեն մնա, որ զարգանա: Այդ տոկոսադրույքով հնարավոր չէ զարգացնել գյուղատնտեսությունը»,-ասաց նա:
Ըստ նրա՝ այսօր անհրաժեշտ են էժան վարկեր, որպեսզի գյուղատնտեսությունը զարգանա, այլապես այսօր գյուղացին բարձր տոկոսով վարկերի տակ է: Լյովա Խաչատրյանը նշեց, որ պետությունը միլիարդների վարկեր է վերցնում և ոչ մի աշխատատեղ, ոչ մի ռեալ արտադրություն չի ստեղծվում: «Պետք է այդ վարկերն ուղղորդեն գյուղատնտեսությանը: Այսօր մեր տնտեսության վիճակը մնացել է հարյուր տարվա առաջվա մակարդակի վրա»,-ասաց նա:
Ինչ վերաբերում է գյուղատնտեսության աճին, ապա պատգամավորն ասաց, որ եթե քաղաքական որոշում լինի այս տարի ևս, գյուղատնտեսությունն աճ կապահովի:
Անդրադառնալով թուրքական ապրանքների երրորդ երկրից ներկրման արգելքի անհրաժեշտությանը՝ Լյովա Խաչատրյանն ասաց, որ այստեղ ավելի շատ ոչ թե արգելքի այլ բարոյական հարց կա և այդ ապրանքները պարզապես չպետք է գնել: «Ամեն ինչ չէ, որ փողով պետք է չափենք»,-եզրափակեց նա: