Ռուսաստանցի ռազմական փորձագետ Ալեքսանդր Խրամչիխինի վերլուծությունները հայկական և ադրբեջանական զինված ուժերի վերաբերյալ ավելի շատ կարելի է համեմատել ինչ-որ ոչ իրական, վիրտուալ խաղերի նկարագրության հետ, այս մասին Tert.am-ի հետ զրույցում հայտարարեց քաղաքագետ Հրանտ Մելիք-Շահնազարյանը։
«Խրամչիխինի հիմնական դժբախտությունն այն է, որ իր դատողությունները կառուցում է բացառապես վիճակագրական տվյալների վրա: Ըստ որում, ոչ այնքան ճշմարիտ: Եվ հաշվի չի առնվում որոշակի գործոններ` հայկական զինված ստորաբաժանումների մարտական ոգին, որը ժամանակին մեծ հաղթանակի բերեց հայկական երկու պետություններին: Եվ նման թվաբանությունները և վերլուծությունները պետք է ավելի շատ համեմատել ինչ-որ ոչ իրական, վիրտուալ խաղերի նկարագրության հետ: Եվ փաստ է, որ իրական քաղաքական գործոնների վրա ուշադրություն չի էլ դարձնում»,-ասել է Հրանտ Մելիք-Շահնազարյանը:
Նշենք, որ Հայաստանի ու Լեռնային Ղարաբաղի զինված ուժերի սպառազինություններին մասին Հայաստանում լայն արձագանք գտած հրապարակման հեղինակ Ալեքսանդր Խրամչիխինը, խոստման համաձայն` հիմա էլ հանդես է եկել է Ադրբեջանի զինված ուժերի սպառազինությունների ու կարողությունների նկարագրությամբ:
Հոդվածագիրը, ի հավելում, նշում է, որ Ղարաբաղյան խնդիրը խաղաղ հանգուցալուծում չի ստանում կողմերի իրար հակադիր դիրքորոշման պատճառով և որ առկա ստատուս-քվոյից բավարարված են բոլորը, այն ձեռնտու է բոլորին, բացի Ադրբեջանից:
«Ավելի քան ակնհայտ է, որ Ադրբեջանի կողմից գնվող զինտեխնիկան (Т-90, САУ «Мста», РСЗО «Смерч», ТОС-1А) մի նպատակ ունի՝ խոցել հայկական պաշտպանությունը Ղարաբաղում: Հարցը միայն նրանում է, թե որ պահին Բաքուն կորոշի, որ հասել է գերիշխող դիրքի և որքան այդ գնահատականը կլինի ադեկվատ»,- կարծում է Խրամչիխինը, ով կանխատեսում է նաև այն, որ կգա ժամանակ, երբ Ռուսաստանի` Ադրբեջանին վաճառած հարձակողական բնույթի զինտեխնիկան կուղղվի հենց նրա դեմ, քանի որ վերլուծաբանը նաև կանխատեսել է, որ նոր պատերազմը Հայաստանի և Ադրբեջանի միջև հեշտությամբ կվերաճի «մեծ եղբայրների» հակամարտության՝ Ռուսաստանի և Թուրքիայի միջև և այս պարագայում մեծ է հավանականությունը, որ Բաքվին վաճառված զինտեխնիկան կրակի ոչ միայն մեր ամենամոտ դաշնակցի դեմ, այլև հենց ռուսական բանակի դեմ:
Վերը նշված վերլուծությունների հետ Հրանտ Մելիք–Շահնազարյանը համաձայն չէ, բացառությամբ այն հատվածի, որտեղ խոսվում է, որ Ադրբեջանը դեմ է հաստատված ստատուս քվոյին: Բայց մյուս կողմից էլ նա նշում է. «Ակնհայտ է, որ հակամարտության ակտիվ փուլի վերսկսման դեպքում կգա մի իրավիճակ, երբ Ադրբեջանը կերազի այսօրվա իր դիրքերի և այսօրվա ազդեցությունը պահպանելու կամ վերականգնելու մասին»։
Հրանտ Մելիք –Շահնազարյանը նաև խոսեց այն շարժառիթների մասին, թե ինչով է պայմանավորված Խրամչիխինի հոդվածաշարը: «Իր առաջին հրապարակումից ստեղծված ալիքը օգտագործել իր անձի պոպուլյարիզացիայի նպատակով, բայց փաստն այն է, որ հայ –ադրբեջանական, հայ-ռուսական հարաբերություններում այդ իրողությունները, միանգամայն այլ են և չեն պատասխանում պարոն Խրամչիխինի պատկերացումներին»,- ասում է Հրանտ Մելիք Շահնազարյանը:
Այսինքն` քաղաքագետը համամիտ չէ, որ հայ-ադրբեջանական լայնամասշտաբ պատերազմը կվերածվի ռուս-թուրքականի: Նման հնարավորություն նա չի տեսնում և ավելի քան համոզված է, որ Թուրքիան պատրաստ չէ այս ժամանակաշրջանում պատերազմել Ռուսաստանի դեմ:
