Ազատության հրապարակում հրավիրած հանրահավաքի ժամանակ «Ժառանգություն» կուսակցության փոխնախագահ Արմեն Մարտիրոսյան իր ելույթում անդրադարձավ ընտրական համակարգին: «Նորանկախ Հայաստանի աքիլլեսյան գարշապարը եղել և մնում է ընտրական համակարգը»,- ասաց նա:
Արմեն Մարտիրոսյանն ասաց, որ Սահմանադրական բարեփոխումները, Ընտրական օրենսգրքի նախագիծը իշխանությունների վերարտադրության նպատակն ունեն: «Ես համոզված եմ, որ դրա դեմ պայքարելու համար երկու ճանապարհ կա, որոնք զուգահեռ պետք է լինեն:Առաջին ճանապարհը` քաղաքական, քաղաքացիական դաշտի համախմբումն է որոշակի առաջարկների շուրջ»,- ասաց նա և նշեց, որ այդ համագործակցությունը պետք է լինի Ազատության հրապարակում:
«Իշխանությունները զիջումների կգնան այն ժամանակ, երբ քաղաքացին տեր կանգնի իր ընտրելու իրավունքին: Այս պայքարը պետք է նաև զուգակցվի քաղաքական և քաղաքացիական ուժերի կողմից միջազգային կազմակերպությունների հետ աշխատանքով, ինչը հիմա կատարվում է: Այս երկու հոսանքներն են,որ միավորվելով ապահովելու են մեր ընտրական իրավունքի վերականգնմանը»,- ասաց նա և նշեց, որ ք քաղաքացիները պետք է պայքարեն իրենց իրավունքի համար, ինչը կբերի իշխանափոխության և սոցիալտնտեսական իրավիճակի լավացման: