Այս աշխարհի թերությունն այն է, որ կիրթ մարդիկ լի են կասկածներով, իսկ հիմարները` ինքնավստահությամբ. Չարլզ Բուկովսկու մտքերը

Չարլզ Բուկովսկին համարվում է  աշխարհի  ամենատաղանդավոր գրողներից մեկը, ով երբեք չէր ապրում  հանրության կողմից ընդունված նորմերի ու կանոնների համաձայն: Նա չափից ավելի շատ էր տարված ալկոհոլով ու կանանցով, իսկ ստեղծագործական կյանքում գրում էր ոչ թե ընթերցողի համար հաճելի, այլ` մեզ շրջապատող դառը իրականության մասին:

AdMe.Ru կայքն ուշագրավ ծաղկաքաղ է արել Բուկովսկու արտահայտած մտքերից ու ներկայացրել դրանցից ամենահետաքրքիրները։

Կյանքի մասին 

Չեմ հավատում, որ հնարավոր է այս աշխարհն ավելի լավը դարձնել, բայց հավատում եմ, որ կարելի է չնպաստել դրա հետագա վատթարացմանը:

Երբ դու արբած ես, աշխարհն էլի գոյություն ունի, բայց այդ ժամանակ այն քո կոկորդից  բռնած չի:

Աշխարհը փրկելու համար պետք է ամեն մարդու հատիկ-հատիկ փրկել. բոլորին փրկելը` ռոմանտիզմ կամ քաղաքականություն է:

Կանանց մասին 

Բոլոր կանայք տարբեր են: Հիմնականում նրանք լավագույնի ու վատագույնի,  կախարդականի ու սարսափելիի համադրություն են: Ամեն դեպքում ես ուրախ եմ, որ նրանք կան:

Մինչ տղամարդիկ ֆուտբոլ են նայում կամ գարեջուր խմում, նրանք` կանայք,  մտածում են մեր մասին, կենտրոնանում, ուսումնասիրում ու որոշում ` ընդունել մեզ, թե դեն նետել, փոխանակել ինչ-որ մեկի հետ, սպանել, թե ուղղակի թողնել-հեռանալ:

Ինչպես կարելի է  վստահել այն էակին, ով ամեն ամիս արնահոսում է, բայց չի մեռնում:

Տաղանդի ու գրողների մասին 

Գրողները հուսահատության ճիրաններն ընկած մարդիկ են, և երբ նրանց մոտ հույս է առաջանում, նրանք դադարում են գրող լինել:

Ինտելեկտուալը  պարզ երևույթի մասին բարդ է խոսում, իսկ նկարիչը բարդ երևույթը նկարագրում է շատ պարզ:

Մարդկանց մասին 

Որոշ մարդիկ չեն կարողանում խենթանալ. նրանք այնքան ձանձրալի կյանք են վարում:

Իհարկե, կարելի է մարդուն սիրել, եթե, իհարկե, նրան շատ մոտիկից չես ճանաչում:

Ներուժը ոչ մի նշանակություն էլ չունի, պետք է գործել:

Եթե քեզ հաջողվել է խաբել մարդուն, չի նշանակում, որ նա հիմար է: Նշանակում է, որ քեզ ավելի շատ էին վստահում, քան դու արժանի էիր:

Գեղեցկությունը փուչ բան է: Դու անգամ պատկերացում չունես, թե որքան է բախտդ բերել տգեղ լինելու հարցում: Դա նշանակում է, որ եթե մարդիկ քեզ հավանում են, ուրեմն  քո մեջ ինչ-որ բան կա:

Հեռուստաէկրանին ամեն տեսակի աղբ տեսնելն այնքան սովորական բան է դարձել, որ մարդիկ արդեն չեն էլ գիտակցում, որ միմիայն աղբ են նայում:

Մարդկային ցեղին ինչ էլ տաս նա կփչացնի, կաղավաղի ու կկործանի դա:

Սիրո մասին 

Սերը կիթառահարների, կաթոլիկների ու շախմատային մանյակների համար է:

Սեքսը հիանալի բան է միայն այն ժամանակ, երբ զբաղվելու ուրիշ բան էլ չկա:

Ինքն իր մասին 

Միայնությունն ուժեղացնում է ինձ, առանց դրա ես կարծես առանց հացի ու ջրի եմ:Առանց դրա անցկացրած ամեն օրը թուլացնում է ինձ: Ես չեմ հպարտանում իմ  միայնությամբ, բայց կախում ունեմ դրանից:

Ես չափից ավելի լավ գիտեմ իմ թերությունների մասին, որպեսզի փոխադարձ սեր պահանջեմ:

Ես ամուսնացած եմ, բայց կին չունեմ:  Իմ կինն իմ սեփական կյանքն է: