ԱՄՆ Օրեգոն նահանգի Առողջության և գիտության համալսարանի ուսանողները 99-ամյա Ռոուզ Մարի Բենթլիի մահից հետո իրականացված դիահերձման արդյունքում պարզել են, որ կինը մոտ մեկ դար ապրել է սխալ տեղերում գտնվող ներքին օրգաններով, հայտնում է The Guardian-ը՝ մանրամասնելով, որ բացառություն է եղել միայն ճիշտ տեղում գտնվող սիրտը:
Բենթլին կենդանության օրոք ակտիվ զբաղվել է լողով, մեծացրել հինգ երեխա, ամուսնուն օգնել ընտանեկան բիզնես վարելու հարցում: Կինը զարկերակային ճնշումից բացի որևէ առողջական խնդիր չի ունեցել ու ապրել է մինչև 99 տարեկան:
Սակայն մահից հետո ուսանողներն արել են ուշագրավ հայտնագործություն, որի արդյունքները ներկայացվել են դիահերձողների համաժողովի ժամանակ:
Սկզբում համալսարանի ուսանողները նկատել են, որ կնոջ արյունատար անոթներն իրարից տարբեր են, հետո, երբ բացել են որովայնային խոռոչը, տեսել են, որ բոլոր օրգանները սխալ տեղերում են:
«Դա բժշկական հրաշք էր, որն անմիջապես մեր աչքի առաջ էր»,-ասել է մասնագետ Քեմերոն Ուոլքերը, որի պնդմամբ՝ այսպիսի շեղումներ ունեցող մարդիկ երբևէ այսքան երկար կյանք չեն ունեցել:
Ուոլքերի խոսքով՝ այսպիսի անոմալիան հնարավոր է յուրաքանչյուր 22 000 ծննդաբերությունից մեկի դեպքում, սակայն ո՛չ Բենթլին, ո՛չ նրա ընտանիքն այդ մասին չեն իմացել:
Բացահայտումից հետո հանգուցյալի դուստրը վերհիշել է, որ երբ մայրը 50-ն անց կին է եղել, ցանկացել է հեռացնել կույր աղիքը, սակայն չի կարողացել, քանի որ բժիշկներին ոչ մի կերպ չի հաջողվել գտնել այդ օրգանը: