Շվեդիայի բնակչուհին, որը դարձել է ռոբոտի իրականացրած արգանդի փոխպատվաստման արդյունքում հղիացած առաջին կինն աշխարհում, առողջ երեխա է լույս աշխարհ բերել, հայտնում է Daily Mail-ը:
Տղան ծնվել է 2,9 կգ քաշով՝ կեսարյան հատման միջոցով:
Աղբյուրը մանրամասնում է, որ աննախադեպ փոխպատվաստումն իրականացվել էր 2017թ. հոկտեմբերին: Այս տարվա հունվարին հայտնի էր դարձել, որ շվեդուհին հղի է: Բժիշկները չեն մանրամասնել, թե ինչ պատճառներով կինը չի կարողացել բնական ճանապարհով հղիանալ: Չի բացառվում, որ նա ծնվել է առանց արգանդի կամ էլ նրա օրգանը հեռացրել են հիվանդության հետևանքով:
Փոխպատվաստումից տասն ամիս անց արհեստական բեղմնավորման ճանապարհով ստեղծված սաղմը փոխպատվաստվել է արդեն իսկ փոխպատվաստված արգանդում:
«Սա ուղղակի ֆանտաստիկ զգացողություն է՝ օգնել լույս աշխարհ գալ այսպիսի առանձնահատուկ, երկար սպասված երեխայի»,-ասել է բժիշկ Պերլինա Դահմ Կահլերը:
Հայտնի է, որ արգանդի փոխպատվաստման արդյունքում աշխարհում ընդամենը 15 երեխա է ծնվել, նրանցից 9-ը՝ Շվեդիայում:
Սակայն վերջին ծննդաբերությունն առանձնահատուկ է նրանով, որ երեխան ծնվել է ոչ թե անմիջապես վիրաբույժների, այլ ռոբոտի իրականացրած փոխպատվաստման արդյունքում:
Եվս հինգ կին ռոբոտի իրականացրած վիրահատության միջոցով արգանդի փոխպատվաստում են արել, սակայն նրանց դեռևս չի հաջողվել հղիանալ:
Այս վիրահատության ժամանակ սարքը հատուկ ջոյսթիքներով կառավարվում է վիրաբույժների կողմից: Արդյունքում բոլոր քայլերն արվում են միլիմետրերի ճշգրտությամբ: Դա հնարավորություն է տալիս ավելի փոքր կտրվածքներ անել դոնոր կնոջ օրգանիզմում, ավելի քիչ արյուն կորցնել, ինչպես նաև կրճատել հետվիրահատական շրջանի կազդուրման գործընթացը:
