ԱԺ Ֆինանսավարկային և բյուջետային հարցերի մշտական հանձնաժողովում քննարկման ներկայացվեց «Սպառողական կրեդիտավորման մասին» ՀՀ օրենքում փոփոխություններ կատարելու մասին» և կից նախագծերի օրենքի նախագիծը:
ԿԲ փոխնախագահ Ներսես Երիցյանն ասաց, որ գյուղվարկերի սպառողական կրեդիտավորման օրենքի շրջանակներով շեմը 2 մլն էր սահմանված, դարձվելու է 5 մլն: Բացի այդ, ըստ նրա՝ միկրոձեռնարկությունները ևս այս ծածկույթի տակ կմտցվեն:
Ներսես Երիցյանը նշեց, որ ծրագիր կա Կառավարության հետ համատեղ միկրոձեռնարկությունների համար, որպեսզի դրանց տրվի սահմանում, և որ լինի առանձին միկրովարկավորման հետ կապված մինչև 1 մլն վարկեր, որոնց կառավարությունը որոշակի խթաններ կտրամադրի, և ճիշտ սպասումներ կառաջացնեն:
Նաև ասաց, որ որոշակի բարելավում են առաջարկում հաղորդակցման հետ կապված: «Բանկերի և ֆինանսական վարկավորում իրականացնող կազմակերպություններին պարտադրվելու է, որ էլփոստի միջոցով անկախ ամեն ինչից վարկերի վերաբերյալ քաղաքացիներին տրամադրվի տեղեկություն՝ չսահմանափակելով այսօր գոյություն ունեցող տարբերակները՝ տեղում տարբերակը և ֆիզիկական փոստի միջոցով առաքման եղանակը»,-ասաց նա:
Նշվում է, որ նախագծի ընդունման արդյունքում օրենսդրորեն կկարգավորվեն ՀՀ գյուղատնտեսության և ՓՄՁ ոլորտներում վարկային հարաբերությունները, կհստակեցվեն վարկառուների իրավունքները և վարկատուների պարտավորությունները, կսահմանվեն վարկային պայմանագրերում ներառվող նվազագույն պայմանները, հատկապես` վարկի տարեկան փաստացի տոկոսադրույքի չափը վարկային պայմանագրերում արտացոլելու պահանջը, որի շնորհիվ ֆինանսական բարձր գրագիտություն չունեցող վարկառուն հնարավորություն կստանա օգտվել առավել ցածր տարեկան փաստացի տոկոսադրույքով վարկերից, իրապես պատկերացնել սպասվելիք իրական ամբողջական ծախսերի չափը, հետևաբար իր համար շահավետ որոշում կայացնել տվյալ տոկոսադրույքով վարկ վերցնելու կամ հրաժարվելու վերաբերյալ:
Հանձնաժողովի նախագահ, «Լուսավոր Հայաստան» խմբակցության պատգամավոր Մանե Թանդիլյանը հետաքրքրվեց, թե ինչպես որոշվեց 5 մլն դարձնել, և ինչ վերլուծություն կա դրա տակ:
Երիցյանը նշեց, որ եթե վերցնեն 2 մլն գյուղվարկերով, և եթե տնտեսվարող սուբյեկտները մինչև 5 մլն վերցնեն, գերակշիռ մասը դրա տակ է ընկնելու: «Հիմա ինչո՞ւ ենք համաձայնել, կառավարությունը աջակցության ծրագրեր է իրականացնում, որը ավելի մեծ հնարավորություններ է տալիս գյուղավարկեր ստանալու, և այդ շեմը ավելացնելով՝ հնարավոր է շրջանառվող միջոցներն արագ արդեն միկրոբիզնեսի վրա իրականացվեն, և այնպես չանենք՝ վարկային պորտֆելն ընկնի սպառողականի տակ»,-բացատրեց նա:
Մանե Թանդիլյանն ասաց, որ չհամաձայնվածության մոտեցումն այն է, որ սպառողական վարկավորումը համարել են որպես անձնական, անհատական, ընտանեկան օգտագործման, և այստեղ արդեն բիզնես են դնում, այստեղ է, որ անհամապատասխանության խնդիր կա:
Միաժամանակ ասաց, որ քննարկումները ցույց են տալիս, որ սպառողական կրեդիտավորումը պաշտպանում է ապառողին՝, որպես քաղաքացի անհատ, որը նաև գրագիտության խնդիր ունի, ներմուծելու նոր գաղափար, որը ՓՄՁ-ն է , մեծ հաշվով լավ է, որ պաշտպանել են, և բայց չեն կարող սահմանել՝ որն է միկրոբիզնեսը, և միգուցե պետք է սպասեին, բայց քայլ առաջ է:
Ներսես Երիցյանը նշեց, որ ԿԲ-ի դիտանկյունով պետք է օրենքը վերաբերեր միայն ֆիզիկական անձանց: «Բայց քանի որ կա քաղաքական թիմ և ամեն զարգացման շրջանում իր խնդիրներն է ստեղծում, բնականաբար պրոֆեսիոնալ ունակություններ դնելով՝ փորձել ենք այնպիսի լուծում տալ, որ բավարարի և՛ քաղաքական օրակարգին, և՛ չառաջացնի ֆինանսական կայունության ռիսկեր, և այս տեսակետից, կարծում եմ, բալանսավորված մոտեցում ենք ներկայացնում»,-ասաց նա:
Նախագիծը դրվեց քվեարկության և միաձայն կողմ քվեարկվեց նիստերի օրակարգ ներառելու համար, պայմանով, որ առաջին երկրորդ ընթերցում շտկումներ կարվեն: