Քաղաքագետ Ալեքսանդր Մարկարովն այսօր մամուլի ասուլիսին վերջին օրերի սահմանային լարվածությունն աննախադեպ համարեց՝ ինտեսիվության և զինատեսակների ներգրավվածության առումով: Ըստ նրա՝ միջազգային հանրությունն այս իրադարձություններից հետո պետք է պատասխանատվության կանչի Ադրբեջանին և բանաձևեր կիրառելուց բացի, կոնկրետ քայլեր կիրառի:
«Միջազգային հանրությունն ունի պատասխանատվության իր բաժինը այն գործընթացի մեջ, որը պարբերաբար իրականացնում է Ադրբեջանը»,- ասաց նա։
Անդրադառնալով այսօր Վիեննայում նախատեսված Մինսկի խմբի համանախագահների հանդիպմանը՝ Ալեքսանդր Մարգարովն ասաց համանախագահները բացի նրանից, որ պետք է կողմերին կրակի դադարեցման կոչեր անեն, այդ կոչերը պետք է լինեն ավելի հասցեագրված՝ նշելով, թե ով է կրում պատասխանատվությունը:
«Ադրբեջանական գործողությունները ցույց են տալիս, որ նրանց համար Մինսկի խումբը այն ատյանը չէ, որի հետ պատրաստ են գնալ խաղաղության»,- ասաց նա:
Բանախոսն այնուհետև նշեց. «Մեր դաշնակիցը՝ ՀՀ և ԼՂ պաշտպանության բանակն է, բայց պետք է աշխատել նաև տարբեր ատյանների հետ»:
Ինչ վերաբերում է ՌԴ-ի դիրքորոշումներին և հայտարարություններին՝ Ալեքսանդր Մարգարովն ասաց, որ Ռուսաստանը մի կողմից հանդես է գալիս, որպես ՀՀ-ի ռազմավարական դաշնակից, իսկ մյուս կողմից ՌԴ-ն Մինսկի խմբի համանախագահող երկրներից է:
«Ռուսաստանը չի ցանկանում փչացնել հարաբերությունները Ադրբեջանի հետ, բայց ունեն պայմանագրային պարտավորություններ Հայաստանի հետ: Ռուսաստանի որոշումները բազմաշերտ էլեմենտներով են պայմանավորված»,- ասաց նա: Իսկ ՀԱՊԿ-ի վերաբերյալ քաղաքագետն ասաց, որ գտնում է, թե ՀԱՊԿ-ը կշարունակի հանդես գալ հայտարարություններով, որ խնդրի լուծումը պետք է խաղաղ բանակցային ճանապարհով լինի, չնայած որ կարծում է, թե Հայաստանի դիմելու դեպքում ՀԱՊԿ-ը պետք է արձագանքի այնպես, ինչպես գրված է ՀԱՊԿ կանոնադրության մեջ:
Անդրադառնալով Ադրբեջանի կողմից «Իսլամական պետության» վարձկաններին օգտագործելուն, նա նկատեց, որ Ադրբեջանի համար դա նորություն չէ: