Այս պահի դրությամբ Զինվորական կենտրոնական հոսպիտալում գտնվում է 36 զինծառայող, որից 4-ի վիճակը գնահատված է ծայրահեղ ծանր, 2-ինը՝ ծանր, մնացածինը` բավարարի մոտ և բավարար:
Այս մասին այսօր լրագրողների հետ զրույցում հայտնեց հոսպիտալի տնօրեն Արամ Ասատուրյանը` նշելով, որ 5 ծայրահեղ ծանր վիճակում գտնվող վիրավորներից մեկի մոտ դրական շարժ է նկատվել:
«Այսինքն` Բաղդասարյան Հրայրը, որի վիճակը ծայրահեղ ծանր էր, արդեն գնահատվում է ծանր»,- նշեց հոսպիտալի տնօրենը` նշելով, որ նրանք բոլորը Երևան են տեղափոխվել Արցախից` առաջնագծում գտնվող հոսպիտալներում առաջին և որոշ առումով մասնագիտացված բուժօգնություն ստանալուց հետո:
Ըստ նրա, հիմնական մասի մոտ կա դրական շարժընթաց, սակայն նա վաղ համարեց խոսել նրանց դուրս գրելու մասին, ինչի մասին հարցրեցին լրագրողները:
«Ծայրահեղ ծանր վիրավորները գտնվում են վերակենդանացման բաժանմունքում, ծանրերի մեջ չկան հիվանդներ, որոնք գտնվում են անգիտակից վիճակում, ընդ որում, այդ ծայրահեղ ծանր վիրավորների մեջ շարքայինների թիվը կազմում է 2, նրանք Երկրապահ կամավորական միության ներկայացուցիչներ են»,- լրագրողներին մանրամասներ ներկայացրեց հոսպիտալի տնօրենը:
Ըստ նրա` ծայրահեղ ծանր հիվանդներից մեկը, ով ունի ողնաշարի վնասվածք, առաջիկայում վիրահատվելու է, քանի որ բեկորը դեռ ողնաշարի մեջ մխրճված է:
Մինչ այդ, նա ունեցել է նաև փայծաղի, թոքի վնասվածքներ:
Հոսպիտալի տնօրենը նշեց, որ, ցավոք, տղաներից ոմանք անդամահատված են, և պրոթեզավորման փուլին դեռ պետք է սպասել: