Ֆրանսիայի խորհրդարանի պատգամավոր, Մարսելի փոխքաղաքապետ Վալերի Բուայեն ևս մեկ անգամ իր աջակցությունն է հայտնել Ղարաբաղին` կոչ անելով «կանգնեցնել թուրք-ադրբեջանական ագրեսիան` ուղղված Հայաստանի և Ղարաբաղի դեմ»:
Ապրիլի 2-ից ի վեր, ինչ սկսվել են ադրբեջանական կողմի հարձակումները Լեռնային Ղարաբաղի դեմ, ֆրանսիացի պատգամավորը սատարում է հայ ժողովրդին և փորձում միջազգային հանրության ուշադրությունը հրավիրել Ադրբեջանի սանձարձակ ագրեսիայի վրա:
Հիշեցնենք, որ օրեր առաջ թվիթերյան և ֆեյսբուքյան էջերում Վալերի Բուայեն գրել է. «Մեր բոլորի մտքերը Ադրբեջանի կողմից հարձակման ենթարկված Լեռնային Ղարաբաղի մեր հայ ընկերների հետ են: Եվս մեկ անգամ քրիստոնյաները ենթարկվում են հարձակման: Լիակատար աջակցություն ենք հայտնում Լեռնային Ղարաբաղի ժողովրդին»:
Ավելի ուշ նա հանդես էր եկել Լեռնային Ղարաբաղի անկախությունը ճանաչելու կոչով` ուղղված միջազգային հանրությանը:
Այսօր երեկոյան Բուայեի գլխավորությամբ բողոքի ցույց է կայանալու Մարսելի քաղաքապետարանի դիմաց: Այս մասին տեղեկացրել է Բուայեն իր ֆեյսբուքյան էջում տեղադրված պաստառով:
