Նախագահ Սերժ Սարգսյանի հայտարարությունը, թե մենք կռվում ենք 80-ականների զենքերով, վերաբերում էր Լեռնային Ղարաբաղի պաշտպանության բանակին, ոչ թե ՀՀ Զինված ուժերին: Tert.am-ի հետ զրույցում ասաց ԱԺ «Հանրապետական» խմբակցության պատգամավոր Սամվել Նիկոյանը՝ անդրադառնալով հանրապետության ղեկավարի՝ Գերմանիայում հնչեցրած հայտարարությանը հաջորդող քննադատություններին:
«ԼՂ պաշտպանության բանակը մարտական գործողություններին մասնակցում է 80-ականների զենքերով: Այո, դա որոշ առումով այդպես է, Լեռնային Ղարաբաղի զինանոցում 80-ականների և դրանից հետո արտադրված զենքի տեսակներ կան: Բայց այդ քննադատությունը, տարակուսանքը, թե ի՞նչ է, մենք չունենք նորագույն զինտեխնիկա, անհիմն է: Նման հարց հնչեցնողները մոռանում են, որ նախագահի խոսքը Լեռնային պաշտպանական բանակի ոչ թե ՀՀ Զինված ուժերում գոյություն ունեցող զենքի տեսակների, զինանոցի մասին էր»,- շեշտեց Սամվել Նիկոյանը:
Վերջինս հիշեցրեց, որ վերջերս Հայաստանի և Ռուսաստանի միջև կնքվեց վարկային համաձայնագիրը, որով Հայաստանը Ռուսաստանից գնել է 200 մլն դոլարի նորագույն սպառազինություն և ռազմական տեխնիկա: Սամվել Նիկոյանն ասաց, թե ոմանք շփոթում են նախագահի հայտարարությունը՝ վերագրելով այն ՀՀ Զինված ուժերին, երբ խոսքը ԼՂ պաշտպանության բանակի մասին էր:
«Ոմանք էլ հասկանում են, թե ինչ է ասում Սերժ Սարգսյանը, բայց շփոթության մեջ են գցում հանրությանը»,- նշեց պատգամավորը:
Դիտարկմանը, թե նախագահի հայտարարությունից հետո մամուլում կասկածներ էին արտահայտվում, թե վարկային համաձայնագրի մատակարարում այդպես էլ տեղի չունեցել, ռուսական զենքերը Հայաստան չեն բերվել, Նիկոյանը չհամաձայնեց՝ խորհուրդ տալով ընթերցել հրապարակված ցանկը, որը ՀՀ-ն ձեռք է բերել ՌԴ-ից:
«Կասկածի տակ դնել, որ ձեռք չի բերվել, անհեթեթ է: Զինատեսակները ձեռք են բերվել, ՀՀ պաշտպանության զինանոցում կան մարտունակ, նորագույն զենքեր: Արդիական զինատեսակները, որոնք կան ՀՀ ԶՈՒ-ում, դեռևս չեն տրամադրվել Ղարաբաղին: Փոխօգնության մասին պայմանագրի ստորագրումից հետո, ամենայն հավանականությամբ, Արցախն էլ կտնօրինի դրանք»,- ընդգծեց պատգամավորը:
Ինչ վերաբերում է Սերժ Սարգսյանի հայտարարությանը, թե «չենք կարող ասել, որ մենք հովանավորներ ունենք և այդ հովանավորների կարիքը կարծես թե չենք էլ զգում, որովհետև հույսը դնում ենք մեզ վրա», Սամվել Նիկոյանն ասաց, թե միտքն ուղղված էր Արևմուտքին, միջազգային հանրությանը:
«Սա դիվանագիտական ուղերձ էր ու պետք չէ այս միտքը ներքաղաքական խնդիրներում շահարկել, օգտագործել: Միջազգային հանրությանն ուղված խոսքում լինում են ձևակերպումներ, որոնք կլուծեն խնդիրը: Եվ գոնե այս պահին շահարկել այս միտքը, անիմաստ է: Բոլորս էլ գիտենք, թե ՀՀ բանակն ինչ կատարելության զինատեսակներ ունի, ինչ ոգի»,- ընդգծեց Նիկոյանը: