Ստամբուլի Սուրբ Հարություն եկեղեցուն կից Պողոսյան-Վարվարյան երբեմնի դպրոցում տեղակայվելու է Հրանտ Դինքի անվան դպրոցը, որտեղ Հայաստանից եկած աշակերտներ են կրթություն ստանում, հայտնում է «Ակօս»-ը։
Վերջերս Ստամբուլում նշվել է Գեդիկփաշայի հայկական Սուրբ Հարություն եկեղեցու 161-ամյակը։
Հենց այդ միջոցառման ընթացքում էլ եկեղեցու հիմնադրամի ղեկավար Վարուժան Թավրան հայտնել է, որ Հրանտ Դինքի անվան դպրոցը տեղակայվելու է Պողոսյան-Վարվարյան դպրոցի շենքում։
Պոլսո պատրիարքի փոխանորդ Արամ արքեպիսկոպոս Աթեշյանը դա չափազանց կարևոր որոշում է համարել։
«Հրանտ Դինքի անվան դպրոցում սովորող 150 աշակերտների համար անում ենք հնարավորը։ Վստահ եմ, որ երեխաները շատ են ուրախանալու, որ նոր դպրոց են ունենալու»,-ասել է նա։
Դպրոցի տնօրեն Հերիքնազ Ավագյանը հայտնել է, որ իրենք երախտապարտ են նոր դպրոցի շենք տեղափոխվելու համար։
«Ստամբուլի հայ համայնքը Հայաստանից եկած երեխաներին սեփական զավակի պես է ընդունում, ինչի համար երախտապարտ ենք։ Աշակերտների թիվն ամեն անցնող օր ավելանում է։ Գործող դպրոցն արդեն մեր պահանջներին չի համապատասխանում։ Բավական ժամանակ է մեր երեխաների համար ավելի լավ պայմաններ գտնելու համար ջանքեր ենք գործադրում։ Վերջապես լուծումը գտնվեց։ Տարիներ առաջ որպես դպրոցի շենք կառուցված այդ շենքը դատարկվելու, մաքրվելու ու մեզ է հանձնվելու։ Սեպտեմբերից հուսով ենք լինել նոր շենքում»,-ասել է նա։