Ռուսաստանն ու ԱՄՆ-ն Սիրիայի հարցով Ժնևում որևէ գաղտնի բանակցություն չեն վարում։ Այդ մասին հայտարարել է ՌԴ արտգործնախարար Սերգեյ Լավրովը, փոխանցում է ՏԱՍՍ գործակալությունը։
«ՌԴ-ի և ԱՄՆ-ի միջև որևէ գաղտնի բանակցություն չկա։ Կա նորմալ աշխատանքային խորհրդակցությունների ռեժիմ, ինչպես նաև Սիրիայի հարցով միջազգային խմբի շրջանակում երկու երկրների համագործակցություն, նաև՝ այդ խմբում հաշտեցման նպատակով ստեղծված ենթախմբերի շրջանակում»,- ասել է նա։
Նախարարի խոսքով՝ Սիրիայի կառավարական զորքերը չեն գործում հրադադարն ընդունած ընդդիմադիր խմբավորումների դեմ, այդ թվում նաև Հալեպում։
ՌԴ արտգործնախարարն ուշադրություն է հրավիրել այն հանգամանքի վրա, որ «Հալեպի շրջակայքում ԻՊ-ի ուժեղ դիրքեր կան, և բավական մեծ տարածք, որը վերահսկում է ահաբեկչական համարվող «Ջեբհաթ ան Նուսրա» խմբավորումը»։
Անդրադառնալով Սիրիայի նախագահ Բաշար ալ-Ասադի ճակատագրին՝ Լավրովը նշել է, թե ԱՄՆ-ում և Թուրքիայում քիչ չեն այն մարդիկ, որոնք ցանկանում են աշխատել «Պլան-Բ»-ի վրա և տապալել նախագահ Ասադին։