Իսպանացի պատգամավորները հացադուլ են սկսել` ի նշան փախստականների հարցող Եվրամիության և Թուրքիայի միջև համաձայնագրի դեմ բողոքի:
Ինչպես փոխանցում է РИА Новости-ն, հացադուլին մասնակցում են 4 օրենսդիրներ` Գալիսիայում Podemos կուսակցությունը ներկայացնող Միգել Անչո Ֆերնան Վելյոն, Equo կուսակցությունը ներկայացնող Խորխե Լուիս Բայլը և Podemos կուսակցության 2 այլ ներկայացուցիչներ` Պեդրո Առոխոն և Էդուարդո Սանտոսը:
«Մենք ցանկանում ենք ողջ երկրով մեկ փախստականներին աջակցող շարժում ստեղծել, որպեսզի քաղաքացիական հասարակությունը դիմակայի այն ամոթին և մարդկային կյանքի անարգանքին, որը դրսևորում է Եվրամիությունը», - ընդգծել է Ֆերնան Վելյոն:
Ապրիլի 22-ին Իսպանիայի մի շարք քաղաքներում կրկին բողոքի ակցիաներ կանցկացվեն` ընդդեմ ԵՄ-ի և Թուրքիայի միջև ձեռք բերված պայմանավորվածության` ի պաշտպանություն փախստականների շահերի:
ԵՄ անդամ երկրների առաջնորդները և Թուրքիայի վարչապետը մարտի 18-ին համաձայնագիր են կնքել` պայմանավորվելով վերադարձնել Թուրքիայից Հունաստան ժամանած անօրինական ներգաղթյալներին` փոխարենը Թուրքիայի համար ազատ վիզային ռեժիմ սահմանելով: