Անգլիայի նորընծա չեմպիոն «Լեսթերի» երկրպագուհի Մենդի Կլարկը, ով աշխատում է «Spire Leicester Hospital» կլինիկայում, 50 հազար ֆունտ է շահել:
Ընթացիկ մրցաշրջանի մեկնարկից առաջ Կլարկի ղեկավար, պլաստիկ վիրաբույժ Մեթ Սմիթը փորձելով կատակել իր ենթակայի հետ, նրան նվիրել է «Լեսթերի»` Անգլիայի չեմպիոն դառնալու խաղադրույք: «Աղվեսների» հաղթանակի վրա Սմիթը 10 ֆունտ է դրել, իսկ գործակիցը կազմել է 5000:
«Մեթը ֆուտբոլի հարցերում ինձ նյարդայնացնելու առիթը երբեք չի կորցրել, չէ որ նա երկրպագում է «Նոթինգհեմ Ֆորեսթին», որի հետ «Լեսթերը» լարված հարաբերությունների մեջ է: Երբ նա խաղադրույքն ինձ նվիրեց, հազիվ կարողացավ զսպել ծիծաղը: Զարմանալի չէ, քանի որ նախորդ առաջնությունում իմ սիրելի թիմը քիչ էր մնում դուրս մնար ԱՊԼ-ից:
Ճիշտն ասած վերջին ամիսների ընթացքում բուքմեյքերների կողմից խաղադրույքը գնելու մի քանի գայթակղիչ առաջարկներ եմ ստացել, սակայն մի կերպ կարողացել զսպել եմ ինձ: Արդյունքում, պարզվեց, որ ճիշտ էի»,- 58-ամյա Կլարկի խոսքերն է մեջբերել «Mirror»-ը:
