ԱԺ արտաքին հարաբերությունների հանձնաժողովի նախկին նախագահ, միջազգայնագետ, ՀՀՇ վարչության անդամ Հովհաննես Իգիթյանը՝ Tert.am-ի հետ զրույցում անդրադարձել է ԼՂ հակամարտության խնդրին: Նա նշեց, որ պարզ դարձավ, որ Հայաստանի անդամակցությունը ԵՏՄ-ին չի լուծում անվտանգության հարցը: «Բոլոր այն մարդիկ, ովքեր ասում էին, որ անխուսափելի է մտնել ԵՏՄ, և դա լուծում է անվտանգության խնդիրներ, պետք է ասեն, որ սխալվել են»,-ասաց նա:
-Ինչպե՞ս եք գնահատում ԼՂ կարգավորման հարցում միջազգային հանրության կոչերը. նախկինում ասվում էր, որ կողմերից որևէ մեկին ձեռնտու չի լինի այստեղ պատերազմական իրավիճակ թույլ տալ։ Այսօր իրավիճակի զսպման կոնկրետ գործողություններ տեսնո՞ւմ եք՝ հաշվի առնելով, որ իրենց կոչերը, որպես այդպիսի, խաղաղ իրավիճակի չեն բերում։ Ո՞ւմ է ձեռնտու այս վիճակը:
-Այն մարդիկ, ովքեր ասում էին, որ թույլ չեն տա Ադրբեջանին պատերազմ սկսել, հատկապես, նկատի ունենալով Ռուսաստանին, նրանք պետք է ասեն, որ սխալվել են, քանի որ Ռուսաստանը զսպող ուժ չէ: Ինչ վերաբերում է միջազգային արձագանքին, ապա, ցավոք, այնպես ստացվեց, որ Հայաստանը համարվում է Ռուսաստանի կցորդ: Թեկուզ մեզ բարեկամ ԱՄՆ-ի սենատորները հայտարարություն անելիս ցավով են նշում այն հանգամանքը, որ Հայաստանը դարձել է Ռուսաստանի քաղաքական կցորդը: Դա նշանակում է, որ աշխարհի ամբողջ գործընթացն ուղղված Ռուսաստանի դեմ, հիմա աշխատում է մեր դեմ: Այսինքն, ցանկացած պետություն կամ միջազգային հանրություն, որը դեմ է արտահայտվում Ռուսաստանին, չի կարող կողմ արտահայտվել Հայաստանին, որովհետև դրանով իրենց թվում է, որ կօգնեն Ռուսաստանին: Հայաստանը պետք է փորձի, մնալով Ռուսաստանի ընկերը, գոնե իրեն Ղազախստանի նման պահի, օրինակ՝ Ղազախստանը դեմ է արտահայտվում Ռուսաստանի ագրեսիվ գործողություններին Ուկրաինայում, իսկ Հայաստանն անվերապահորեն ընդունում է ամեն ինչ, ինչ անում է Ռուսաստանը:
-Հիմա շատ է խոսվում, որ ԵՏՄ-ի անդամակցությունը չարդարացրեց անվտանգության հետ կապված մեր ակնկալիքը և կարելի է վերանայել անդամակցության որոշումը, ինչպիսի՞ն եք տեսնում Հայաստանի ապագան ԵՏՄ-ի կազմում:
-ԵՏՄ-ն ապացուցեց, որ ինքը՝ որպես տնտեսական գործոն, չի աշխատում, և նույնիսկ անդամ երկրները փորձում են իրենց շուկան պաշտպանել հենց ԵՏՄ-ից, դա է պատճառը, որ Բելառուսը խոսում է սահմաններում մաքսային կետեր դնելու մասին և բազմիցս արտահայտել է, որ եթե ԵՏՄ-ն խանգարի իր երկրի շահերին, ապա նա դուրս կգա: Հայաստանը երբեք տնտեսական հարց առաջ չէր քաշում, չէր կապում իր ապագան ԵՏՄ-ի հետ, ես հիշում եմ, որ հանրապետական կուսակցության պատգամավորները նշում էին, որ Հայաստանի անդամակցությունն առաջին հերթին լուծում է մեր անվտանգության հարցը և հիմա գոնե պարզ է, որ որևէ անվտանգության հարց չի լուծում, և նրանք պետք է հայտարարեն, որ սխալվել են: Ավելին՝ ԵՏՄ-ից առնվազն երկու երկիր պարզ պրոադրբեջանական դիրքորոշում են որդեգրել, իսկ Ռուսաստանն ավելի շատ պրոադրբեջանական է, քան պրոհայկական:
-Բայց ընդդիմությունից, օրինակ՝ Լևոն Տեր-Պետրոսյանը և իր կողմնակիցները ևս ԵՏՄ-ի կողմնակիցներն էին, և բացի իշխանությունից հիմա իրենք էլ պե՞տք է նշեն, որ այդ հարցում սխալվել են:
-Իհարկե, բոլոր այն մարդիկ, ովքեր ասում էին, որ Ռուսաստանը մեզ կփրկի և ԵՏՄ-ն մեր ապագան է, պետք է ասեն, որ մենք սխալվել ենք, որ կարողանան այլ միջոցներ էլ փնտրեն: Հիմա էական չէ ԵՏՄ-ից դուրս գալը կամ դուրս չգալը, բայց գոնե հայտարարություններ պետք է արվեն, որ ԵՏՄ-ն չլուծեց այն հարցերը, որ մենք դնում էինք: Իհարկե, բոլոր այն մարդիկ, ովքեր ասում էին, որ անխուսափելի է մտնել ԵՏՄ և դա լուծում է անվտանգության խնդիրներ, պետք է ասեն, որ սխալվել են:
-Իսկ, ըստ Ձեզ, ի՞նչ խնդիր է այսօր լուծում ՀԱԿ-ը, ի՞նչ միտում եք տեսնում նրանց վարած քաղաքականությունում:
-Ես չգիտեմ, թե ինչ խնդիր են լուծում, պետք է նայել այն հայտարարությունները, որ նրանք անում են: Լևոն Զուրաբյանը ասում է, որ մենք պետք է ցույց տանք, որ մենք միասին ենք, որ խրամատներում զինվորը լավ կռվի, դե եթե այս հարցն է դրված, նորմալ է:
-Ըստ Ձեզ այսօր ներքաղաքական վիճակում ի՞նչ վիճակ է, ում նայելիս հասարակությունը կարող է վստահ լինել, որ ընդդիմություն է:
-Եթե հաշվի առնենք այն ընտրական մթնոլորտը, որը եղել է և շարունակում է մնալ՝ հաշվի առնելով վերջին տեղական ընտրությունները, ապա որևէ նշանակություն չունի, թե հասարակությունն ում է ուզում կամ ում չի ուզում: Արդյո՞ք մինչև այս պահը հասարակությունը ուզում էր այն մարդկանց, որոնց տեսնում ենք խորհրդարանում:
-Նոր Ընտրական օրենսգրքի նախագիծը չի՞ գալիս լուծելու վստահության խնդիրը, ինչպես պնդում են:
-Ոչ, նախկին Ընտրական օրենսգիրքը թույլ չէր տալիս կաշառել, բռնի ձևով վստահված մարդկանց հանել և այլն, թույլ չէր տալիս, բայց դա արվում էր: Ո՞րն է այդ զսպող մեխանիզմը, որը չի եղել և հիմա առաջարկվում է. չկա նման բան:
-Ի՞նչ զարգացում եք սպասում ԼՂ հակամարտության հարցում:
-Ես Ադրբեջանին զսպող որևէ մեխանիզմ առայժմ, բացի ԼՂ բանակի այդ պաշտպանական միջոցներից, ցավոք, չեմ տեսնում: Հայաստանի իշխանությունները նորից զանգում են Լավրովին, խնդրում են, Լավրովն էլ խոստանում է, որ կասի Ադրբեջանին, որ չկրակի, բայց այդ մեխանիզմը չի գործում:
↧
Բոլոր նրանք, ովքեր նշում էին, որ ԵՏՄ անդամակցությունն անվտագնության խնդիրներ է լուծում, պետք է ասեն, որ սխալվել են. Հոհվաննես Իգիթյան
↧