ԱՄՆ-ի Ալաբամա նահանգում բնակվող Թեյլոր Ռոզենթալը, ով առաջին օգնության պարագաներ տրամադրող RecMed ավտոմատ սարքի ստեղծողն է, հրաժարվել է 41 մլն դոլարով վաճառել իր գաղափարի իրականացմամբ զբաղվող ստարտափը:
Ինչպես նշում է news.com.au կայքը, դեռահասը ներկայացրել է RecMed-ի նախագիծն այն ժամանակ, երբ մասնակցում էր Երիտասարդ ձեռնարկատերերի ակադեմիայի կազմակերպած դասընթացներին:
«Մեզ հանձնարարված էր ներկայացնել հետաքրքիր բիզնես գաղափար: Ամեն անգամ, երբ ես ներկա եմ լինում բեյսբոլի խաղերին, նկատում եմ, որ վնասվածքներ ստացած երեխաների ծնողներն առաջին օգնության պարագաների` յոդի, բինտի, բամբակի կարիք ունեն, սակայն չեն կարողանում գտնել դրանք: Ուստի` ես որոշեցի լուծել այդ խնդիրը»,-պատմել է Ռոզենթալը:
Նրա ստեղծած ավտոմատներից հնարավոր կլինի մի քանի դոլարով ձեռք բերել առաջին օգնության համար անհրաժեշտ բոլոր պարագաները:
Աղբյուրը մանրամասնում է, որ RecMed-ի համար համապատասխան արտոնագիրը ձեռք բերելուց հետո, հնարամիտ դեռահասը սկսել է ստանալ բազում բիզնես առաջարկներ, որոնք, սակայն, մերժել է:
Մասնավոր ներդրումների միջոցով Ռոզենթալն արդեն 100.000 դոլար է ստացել ու պատրաստվում է սկսել սարքի արտադրությունը: Հայտնի է, որ նա արդեն 100 ավտոմատի պատվեր է ստացել ամերիկյան Six Flags ընկերության կողմից:
«Այնքան հետաքրքիր էր հետևել, թե ինչպես 1 տարվա ընթացքում Թեյլորը մեծացավ ու վերածվեց ինքնավստահ, գործարար մարդու: Եվ չնայած գրանցած բոլոր հաջողություններին` նա շարունակում է համեստ տղա մնալ, ով միշտ պատրաստ է օգնության ձեռք մեկնել: Նա ընդամենը 14 տարեկան է։ Կարծում եմ` Բիլ Գեյթսը պիտի նրանից զգուշանա»,-ասել է Ռոզենթալի ուսուցչուհի Կլարինդա Ջոնսը:
