Չինական Moxi Group ստարտափը հայտարարել է, որ պատրաստվում է նորարար սմարթֆոն ներկայացնել, որը հնարավոր կլինի փաթաթել դաստակի շուրջ:
Ինչպես ներկայացնում է CNN-ը, չինական ընկերության արտադրած սարքավորումը կներկայանա ճկուն սենսորային էկրանով, որը կաշխատի սովորական հեռախոսի պես անգամ ձեռքին կապած վիճակում, ինչպես ժամացույցը կամ թևնոցը: Այն աշխատում է նաև հարթ ձգված վիճակում, ինչպես սովորական սմարթֆոնը:
Ճկվող էկրանի կառուցման համար կիրառվել է գրաֆեն, որը աշխարհի ամենաբարակ, բայց և չափազանց ամուր, թեթև, թափանցիկ և ճկվող նյութ է: Ընկերությունից հայտնում են, որ արդեն թողարկել են սմարթֆոնի նախատիպը և մտադիր են մինչև տարեվերջ 100 000 օրինակ վաճառել Չինաստանում:
Ներկա պահին արտադրության պատրաստվող սմարթֆոնները սև-սպիտակ էկրան են ունենալու, սակայն ընկերությունից նշում են, որ ամբողջական գունավոր տարբերակը կներկայացվի 2018-ին: Սև-սպիտակ էկրանով տարբերակը Չինաստանում կվաճառվի 5000 յուանով ($760), որը iPhone-ի ամենամատչելի մոդելից էլ էժան է: