Եվրամիությունը ուրբաթ որոշում է կայացրել մինչև 2017-ի հունիսի 1-ը երկարաձգել Սիրիայի նկատմամբ սահմանված պատժամիջոցները: РИА Новости-ի փոխանցմամբ` այս մասին ասվում է ԵՄ Խորհրդի կոմյունիկեում
«2016-ի մայիսի 27-ին Խորհուրդը սիրիական ռեժիմի նկատմամբ ԵՄ պատժամիջոցները երկարաձգել է մինչև 2017-ի հունիսի 1-ը: Այս որոշումը կայացվել է Խորհրդի` 2014-ին ընդունած եզրակացության շրջանակներում, որում ասվում է, որ ԵՄ-ն կշարունակի պատժամիջոցներ կիրառել ռեժիմի և դրա կողմնակիցների դեմ, քանի դեռ կշարունակվեն ճնշումները», - ասվում է հայտարարության մեջ
ԵՄ դիվանագիտական աղբյուրը պարզաբանել է, որ ուրբաթ կայացրած որոշմամբ Խորհուրդը երկարաձգել է Սիրիայի դեմ գործող պատժամիջոցների երկու փաթեթները` ինչպես անհատական, այնպես էլ տնտեսական:
Սիրիայի դեմ պատժամիջոցները ներառում են նավթային էմբարգոն, մի շարք ներդրումների սահմանափակումներ, սիրիական Կենտրոնական բանկի միջոցների սառեցում, սարքավորումների և տեխնոլոգիաների արտահանման սահմանափակում:
Անհատական պատժամիջոցները նախատեսում են ԵՄ մուտք գործելու արգելք և ակտիվների սառեցում: Դրանք գործում են 200 ֆիզիկական և 70 իրավաբանական անձանց նկատմամբ, որոնց Եվրամիությունը պատասխանատու է համարում բնակչության նկատմամբ ճնշումներ գործադրելու համար: