Խաղաղություն չեն մուրում, խաղաղությունը պետք է լինի արժանապատիվ: Այս մասին ԱԺ ճեպազրույցների ժամանակ հայտարարեց «Հայաստան» խմբակցության ղեկավար Սեյրան Օհանյանը՝ անդրադառնակով Արդբեջանի և Հայաստանի միջև խաղաղության պայմանագրի հնարավոր կնքմանը:

Ըստ Օհանյանի, խաղաղության գործընթացը միակողմանի պարտադրանքի և միակողմանի ճնշումների արդյունք է:

«Արդյունք է նաև նրա,  երբ ՀՀ իշխանությունների խոսույթում նշվում է՝ եկեք պայմանավորված կետերի շուրջ որևէ բան ստորագրենք և դրանից հետո մնացած պայմանավորվածությունների ուղղությամբ կամ մնացած կետերի շուրջ աշխատանք տանենք: Սա նման է սահմանազատման և սահմանագծման գործընթացին, երբ որևէ մի փաստաթուղթ գոյություն չուներ, բայց միակոմանի զիջումներ իրականացվեցին»,- ասաց Օհանյանը:

Նա շեշտեց, որ Ադրբեջանի նման հռետորաբանության և նրանց կողմից իրականացրած արցախցիների բռնի տեղահանումից հետո, որի մեկ տարին է լրանում, շատ դժվար է մտածել խաղաղության մասին:

«Խաղաղության պայմանագրի լիարժեք փաստը կիրակացնվի այն դեպքում, երբ որ պայմանավորվածություն լինի բոլոր կետերի ուղղությամբ և այնտեղ նշված լինի Արցախին վերաբերող հարց, մեր բոլոր գերիներին և նաև Արցախի ռազմաքաղաքական ղեկավարության վերադարձին վերաբերող հարց: Այս ձևով՝ խաղաղության պայմանագիրը պարզապես խաբկանք է կամ շեղում իրողությունից: Ադրբեջանի ղեկավարության հռետորաբանությունը չի խոսում նրա մասին, որ իրենք խաղաղություն են ցանկանում»,- ընդգծեց պատգամավորը:

Վարչապետ Նիկոլ Փաշինյանը պաշտոնական այցով մեկնել է Վրաստան: Այս մասին տեղեկանում ենք ՀՀ վարչապետի մամուլի խոսնակ Նազելի Բաղդասարյանի ֆեյսբուքյան էջից։

Դիմավորման պաշտոնական արարողությունից հետո տեղի է ունենալու Նիկոլ Փաշինյանի և Վրաստանի վարչապետ Իրակլի Կոբախիձեի առանձնազրույցը, այնուհետև քննարկումները կշարունակվեն ընդլայնված կազմով:

Քննարկումների արդյունքներով Հայաստանի և Վրաստանի վարչապետները հանդես կգան հայտարարություններով:

Երեկ՝ սեպտեմբերի 15-ին, մահվան ելքով վրաերթ է տեղի ունեցել Վայոց ձորի մարզում: Ինչպես հայտնում է Shamshyan.com-ը,  Ժամը 20:45-ի սահմաններում «Վայոց ձոր» բժշկական կենտրոնից ՀՀ ներքին գործերի նախարարության ոստիկանության Եղեգնաձորի բաժին ահազանգ է ստացվել, որ շտապօգնության բժիշկների հերթապահ խումբը ժամը 20:15-ին կանչով մեկնել է Երևան-Մեղրի ավտոճանապարհի Մալիշկա գյուղի արագաչափի մոտ, որտեղ հայտնաբերել են կնոջ դի:

Պարզվել է, որ ժամը 20:00-ի սահմաններում դեռևս անհայտ մակնիշի ու համարանիշի ավտոմեքեանայի վարորդը Երևան-Մեղրի ավտոճանապարհի 128 կմ հատվածում վրաերթի է ենթարկել ճանապարհի աջակողմյան հատվածում կանգնած հետիոտն, Վայոց ձորի մարզի բնակիչ 37-ամյա Սիլվա Ա.-ն, որից հետո վարորդը, նրան թողնելով անօգնական, դիմել է փախուստի:  Վրաերթի ենթարկվածը տեղում մահացել է:

Պարզվել է, որ վրաերթը կատարել է Վայոց ձորի մարզի բնակիչ 68-ամյա Սերժիկ Խ.-ն՝ իր վարած «Mercedes» մակնիշի ավտոմեքենայով: Ոստիկանությունը նրան  հայտնաբերել է, ապա մահվան ելքով վրաերթ կատարելու ու դեպքի վայրը լքելու հիմնավոր կասկածանքով ձերբակալել: 

Դեպքի փաստով Վայոց ձորի մարզային քննչական վարչությունում նախաձեռնվել է քրեական վարույթ:  

Բագրատ Սրբազանն այցելել է Ազգային ժողով: «Քաղաքական, հասարակական բոլոր ուժերի ու մտավորականների հետ հանդիպել ենք, հիմա էլ հանդիպում ենք ԱԺ խմբակցությունների հետ։ Քննարկելու ենք առաջիկա գործողություններին իրենց անելիքներն ու հասկանանք, թե ինչ ճանապարհով են առաջ գնալու»,-հայտարարել է նա:

«Եթե «Քաղաքացիական պայմանագիր» խմբակցությունն ուզում է, ապա կհանդիպենք, մանավանդ, որ այդքան զազրախոսել են։ Խոստովանության ժամ էլ կարող է լինել, թե ինչու են զազրախոսել»,-ավելացրել է Սրբազանը:

Սեպտեմբերի 9-ից 15-ը ՆԳՆ ՓԾ ճգնաժամային կառավարման ազգային կենտրոնում գրանցվել է 567 դեպք, որից 198-ը՝ արտակարգ:

Մասնավորապես՝ հրդեհի՝ 113, փլուզման՝ 5, պայթյունի, ջրային տրանսպորտի մասնակցությամբ պատահարի, կենսաապահովման կոմունալ համակարգերում, մայրուղային խողովակաշարերում վթարի, քարաթափման, դժբախտ պատահարի՝ 1-ական, ուժեղ քամու, բնական հրդեհի, պայթուցիկ սարքերի տեղադրման, զինամթերքի հայտնաբերման՝ 2-ական, վայրի կենդանիների հարձակման, տեղատարափ անձրևի՝ 3-ական, թունավորման՝ 5, օձի նկատման՝ 37, կեղծ ահազանգի՝ 7, ինքնասպանության փորձի՝ 13, ճանապարհատրանսպորտային պատահարի՝ 57, ինչպես նաև՝ կենցաղային կանչի՝ 193, հրդեհի ծագման սպառնալիքի՝ 40, հրդեհի կեղծ կանչի՝ 22, 56 այլ դեպքեր:

Եղանակային պայմաններով և այլ գործոններով պայմանավորված գրանցվել է տրանսպորտային միջոցների արգելափակման 13 դեպք: Փրկարարներն օգնություն են ցուցաբերել 21 քաղաքացու և անվտանգ տարածք տեղափոխել ավտոճանապարհներին արգելափակված 18 տրանսպորտային միջոց:

Նախորդ շաբաթվա ընթացքում տուժել է 94, զոհվել՝ 15 մարդ: Փրկարարական գործողությունների արդյունքում փրկվել է 8 մարդ:

Փրկարար ծառայությունը հորդորում է պահպանել անվտանգության կանոնները:

«Հիդրոօդերևութաբանության և մոնիթորինգի կենտրոն» ՊՈԱԿ-ը ներկայացրել է առաջիկա օրերի եղանակի կանխատեսումը։

Երևանում սեպտեմբերի 16-ի երեկոյան ժամերին, 17-21-ին՝ ժամանակ առ ժամանակ սպասվում է անձրև և ամպրոպ, ամպրոպի ժամանակ նաև քամու ուժգնացում՝ 18-21մ/վ արագությամբ։

Մարզերում սեպտեմբերի16-ի երեկոյան ժամերին առանձին շրջաններում, 17-21-ին՝ շրջանների զգալի մասում ժամանակ առ ժամանակ սպասվում է անձրև և ամպրոպ, սեպտեմբերի 17-ին և 19-20-ին առանձին վայրերում՝ ինտենսիվ։ Առանձին վայրերում սպասվում է նաև մառախուղ։

Քամին՝ հյուսիսարևմտյան՝ 2-5մ/վ, ամպրոպի ժամանակ սպասվում է քամու ուժգնացում 18-22մ/վ արագությամբ։

Օդի ջերմաստիճանը սեպտեմբերի 17-ի ցերեկը կնվազի 3-6, սեպտեմբերի 19-20-ին` ևս 5-7 աստիճանով։

Երեկ՝ սեպտեմբերի 15-ին, խոշոր ավտովթար է տեղի ունեցել Արագածոտնի մարզում: Ժամը 18:00-ի սահմաններում Երևանի բնակիչ 25-ամյա էդուարդ Ալեքսանյանն իր վարած «Toyota» մակնիշի ավտոմեքենայով Երևան-Գյումրի ավտոճանապարհի 14 կմ հատվածում, դեպի Աշտարակ ընթանալիս, դուրս է եկել երթևեկելի գոտուց, բախվել ծառերին և կոտրել դրանցից երկուս:  

Ինչպես հայտնում է shamshyan.com-ը, վթարի հետևանքով Է. Ալեքսանյանը, նրա ուղևորներ, Երևանի բնակիչ 33-ամյա Արա Գասպարյանն ու Արարատի մարզի բնակիչ 29-ամյա Անի Հովսեփյանը մարմնական վնասվածքներով տեղափոխվել են Երևանի «Արմենիա» բժշկական կենտրոն:  

Վթարի փաստով քննչական վարչությունում նախաձեռնվել է քրեական վարույթ:

Ականատեսների խոսքով՝ վթարի ենթարկվածների թվում կան դերասան և տիկտոկեր:

Վարչապետ Նիկոլ Փաշինյանը պաշտոնական այցով ժամանել է Վրաստան։ Այս մասին նա հայտնել է իր թելեգրամյան ալիքում՝ հրապարակելով լուսանկարներ։ 

Ավելի վաղ վարչապետի մամուլի խոսնակ Նազելի Բաղդասարյանը հայտնել էր, որ դիմավորման պաշտոնական արարողությունից հետո տեղի է ունենալու Նիկոլ Փաշինյանի և Վրաստանի վարչապետ Իրակլի Կոբախիձեի առանձնազրույցը, այնուհետև քննարկումները կշարունակվեն ընդլայնված կազմով:

Քննարկումների արդյունքներով Հայաստանի և Վրաստանի վարչապետները հանդես կգան հայտարարություններով:

Լուսանկարները՝ Tert.am-ի թելեգրամյան ալիքում։

Բրիտանացի սուպերմոդել Նաոմի Քեմփբելն այցելել է Բաքու, որտեղ նրան ընդունել է Ադրբեջանի նախագահ Իլհամ Ալիևը:

Մոդելն Instagram-ում կիսվել է այցից իր տպավորություններով։

Քեմփբելը շնորհակալություն է հայտնել Ալիևին, նրա օգնական Անար Ալեքպերովին, Երիտասարդության և սպորտի նախարար Ֆարիդ Գայբովին, «Ֆորմուլա 1» ավտոմրցաշարի նախագահ և գործադիր տնօրեն Ստեֆանո Դոմենիկալիին և «Ֆորմուլա 1»-ի խորհրդատու Ֆլավիո Բրիատորեին։

«Բաքվում «Ֆորմուլա 1» ավտոմրցաշարին մասնակցելը հրաշալի փորձառություն էր ինձ համար: Ադրբեջանում Գրան պրիի ժամանակ սև ու սպիտակ դրոշը պահելը պատիվ էր»,- գրել  է Քեմփբելը։

Լուսանկարները կարող եք դիտել Tert.am-ի թելեգրամյան ալիքում:

Կարող էի ընդհանրապես ասել  այս ամբողջ կինոյի հաջորդ սերիաներում ես չկամ, բայց ստիպված եմ անդրադառնալ: Այս մասին դատական նիստի ընթացքում իր պաշտպանական ճառի ներկայացման ժամանակ հայտարարեց ՍԴ դատավոր, Արդարադատության նախկին նախարար Հրայր Թովմասյանը:

«Ինձ համար շատ հեշտ կլիներ այստեղ վերջակետ դնեի ու ավարտեի, ասեի՝ սրանից հետո ընդհանրապես իմաստ չկա շարունակելու, որ ես այս կինոյի տղան չեմ և ընդհանրապես՝ չկամ: Ես ստիպված եմ հիմա, ելնելով ստեղծված ոչ ստանդարտ իրավիճակից, անդրադառնալ մեղադրական եզրակացության այս մասերին՝ հիմք ընդունելով այն, որ ինչ գրված է, վերաբերում է նաև ինձ»,- ասաց Թովմասյանը:

Նա շարունակեց՝ գրված է, որ Նորայր Փանոսյանը նոտարներից պահանջել և ստացել է ամսական 830 հազար դրամ ամսավճար:

«Ո՞ր փուլում է սա պահանջել և ստացել: Երբ խոսքը գնում է քաղաքացիաիրավական պայմանագրի մասին, ի՞նչ պահանջի մասին կարող է խոսք լինել: Ամբողջ քրեական գործում ես իրականացնում եմ Փանոսյանի պաշտպանությունը, կարծեք թե: Բովանդակային առումով, ամբողջ քրեական գործում՝ հիմա արդեն այստեղ, մեկ նախադասություն անգամ չկա, որ իրենց պարտադրել է ու հարկադրել է, նման բան գոյություն չունի»,- ասաց նա:

Հիշեցնենք, որ Հրայր Թովմասյանին մեղադրանք է առաջադրվել պաշտոնեական լիազորությունները չարաշահելու համար, որն առաջացրել է ծանր հետևանքներ։ Մեղադրող կողմը պահանջում է 7 տարի ազատազրկում: Թովմասյանը չի ընդունում մեղադրանքը և որակում է այն քաղաքական:

Ադրբեջանը բողոքի նոտա է հղել Ռուսաստանի Դաշնության արտաքին գործերի նախարարությանը՝ Չեչնիայում Ադրբեջանի երեք քաղաքացիների՝ Նիհադ Ռզաևի, Էլխան Շիրինովի և Վուգար Մահարամովի ձերբակալության կապակցությամբ, հայտնում է ԱՊԱ գործակալությունը՝  վկայակոչելով դիվանագիտական աղբյուրներին։

Ըստ ստացված տեղեկատվության՝ Ադրբեջանը մտահոգություն է հայտնել, որ ձերբակալված ադրբեջանցիներին, իբր, բռնի ուժով ուղարկել են Ուկրաինայում պատերազմական գոտի։ Այդ կապակցությամբ ադրբեջանական կողմը դիմել է ՌԴ ԱԳՆ՝ իրավիճակը հասկանալու և իր քաղաքացիների իրավունքները պաշտպանելու համար միջոցներ ձեռնարկելու պահանջով։

ASUS ընկերությունը թողարկել է նոր Zephyrus G16 (GA605) խաղային նոութբուքը, որն առանձնանում է հզորության, նրբագեղության և էլեգանտության համադրությամբ: AMD Ryzen™ AI 9 HX 370 պրոցեսորով համալրված նոութբուքը եզակի սարք է, որը կարող է բավարարել ինչպես գեյմերների, այնպես էլ բարձր արտադրողականությամբ հավելվածների հետ աշխատող մասնագետների պահանջները:

Նոր սերնդի Zephyrus G16-ն ընդգծում է սարքի բազմակողմանիությունը, ինչն իդեալական է ոչ միայն խաղերի, այլև առօրյա առաջադրանքների կատարման համար։ Սարքի հնարավորությունները և կոմպակտ չափերն այն հարմար են դարձնում ցանկացած իրավիճակներում օգտագործման համար:

Սարքի հզոր կատարողականությունը՝ զուգորդված վառ ROG Nebula OLED էկրանի և հարմարավետ լիաչափ ստեղնաշարի հետ, ապահովում են առավելագույն հարմարավետություն առօրյա և աշխատանքային խնդիրների կատարման ժամանակ:

Նոթբուքն ունի ալյումինե պատյան, որը ոչ միայն դիմացկուն է, այլև ունի ոճային դիզայն։ Պատյանը ստեղծվել է արտադրական բարդ գործընթացի շնորհիվ, որի ընթացքում օգտագործվել են բարձր ճշգրտության հաստոցներ՝ ապահովելով նոութբուքի կատարյալ տեսքը: Նոր Zephyrus G16-ն ունի նաև գունային նոր լուծում՝ Platinum White: Թանկարժեք մետաղից ոգեշնչված այս երանգը մտազուգորդվում է շքեղության հետ և ընդգծում սարքի նրբագեղությունը։ Բացի այդ, էկրանի կափարիչը զարդարված է անկյունագծային Slash LED լուսավորությամբ, որը յուրահատուկ ոճ է հաղորդում նոութբուքին:



ROG Zephyrus G16-ն առաջին նոթբուքներից է, որը նախատեսված է արհեստական բանականության հետ աշխատելու համար: AMD Ryzen™ AI 9 HX 370 պրոցեսորն ունի 12 միջուկ և 24 հոսքեր՝ արհեստական բանականության աջակցությամբ գործող հավելվածներում հզոր արտադրողականություն ապահովելու համար: Ներկառուցված նեյրոնային պրոցեսորն ի վիճակի է մշակել մինչև 50 TOPS՝ նոութբուքը հզոր գործիք դարձնելով նորագույն տեխնոլոգիաների (Windows Copilot, Adobe Firefly) հետ աշխատելու համար:

GeForce RTX 4070 գրաֆիկական քարտն ունի DLSS 3 և Reflex տեխնոլոգիաներ, որոնք նախատեսված են խաղալու գործընթացն ավելի հարմարավետ և հարթ դարձնելու համար: Բացի այդ, գրաֆիկական քարտը իրեն հրաշալի է դրսևում նաև գեներատիվ արհեստական բանականության և նեյրոնային ցանցերի հետ աշխատելու գործընթացներում՝ թույլ տալով օգտվողին կենտրոնանալ ստեղծագործ առաջադրանքների վրա և բարձրացնել արտադրողականությունը:

Նոր Zephyrus G16-ի հիմնական առանձնահատկությունն OLED էկրանն է: Սա առաջին ROG նոութբուքն է OLED էկրանով, որն ապահովում է պատկերի անհավատալի որակ՝ 2.5K լուծաչափով և 240 Հց թարմացման արագությամբ: Բարձր պիքսելային խտությունը և գունային ճշգրիտ արտացոլումն այս էկրանն իդեալական են դարձնում ինչպես խաղերի, այնպես էլ մեդիա բովանդակության հետ աշխատանքի համար:

OLED տեխնոլոգիան ապահովում է խորը սև գույն և գերազանց կոնտրաստ, ինչը հատկապես կարևոր է HDR բովանդակությունը դիտելիս: VESA DisplayHDR™ True Black 500 հավաստագրի շնորհիվ օգտվողները կարող են վայելել հարուստ գույներ և բարձր ճշգրտության պատկերներ:

Նոթբուքի սառեցումը ևս կատարվում է ամենաբարձր մակարդակով։ Կատարողական բաղադրիչներից ջերմությունը հեռացնելու համար կիրառվում են 2-րդ սերնդի Arc Flow օդափոխիչներ, իսկ պրոցեսորի դեպքում օգտագործվում է բարձր արդյունավետությամբ հեղուկ մետաղի ջերմային միջերես:

Երրորդ հավելյալ օդափոխիչը հեռացնում է տաք օդը գրաֆիկական պրոցեսորից և մյուս առանցքային բաղադրիչներից՝ ապահովելով սարքի անխափան աշխատանքը նույնիսկ ինտենսիվ խաղերի կամ շատ ռեսուրսներ պահանջող հավելվածների հետ աշխատանքի, օրինակ՝ տեսամոնտաժի ժամանակ:

Ուշադրության է արժանի նաև Zephyrus G16-ի ներկառուցված բարձրախոսների համակարգը։  Կատարելագործված ցածր հաճախականության բարձրախոսների շնորհիվ նոութբուքն ապահովում է հզոր և հստակ ձայն: Սա թույլ է տալիս ընկղմվել խաղի մեջ, վայելել երաժշտություն կամ փոդքասթներ լսել խորը բասով և հստակ հնչողությամբ:

Արդյունքում Zephyrus G16-ը (GA605) կատարյալ ընտրություն է նրանց համար, ովքեր փնտրում են առաջադեմ տեխնոլոգիաներով համալրված ունիվերսալ սարք: OLED էկրանը, կոմպակտ չափերը, բարձր արտադրողականությունը, արհեստական բանականության հետ աշխատանքի հնարավորություններն այս նոութբուքն անփոխարինելի են դարձնում ինչպես ստեղծագործելու, այնպես էլ աշխատելու համար:

Երևան-Մոսկվա չվերթի ինքնաթիռն արտակարգ վայրէջք է կատարել Աստրախանում։ Այս մասին հայտնում է Ինտերֆաքսը։

Նշվում է, որ պատճառն ուղևորներից մեկի վատ ինքնազգացողությունն է եղել։ Օդանավակայանի մամուլի ծառայությունից տեղեկացրել են, որ նրան տեղափոխել են քաղաքային բժշկական կենտրոն։

Երևանի օդում փոշու քանակը չափող 108 սարք է տեղադրվել. տվյալներն առցանց հասանելի են բոլորին: Այս մասին տեղեկացնում են Երևանի քաղաքապետարանից:

«Խնդրի հիմնական լուծումը կանաչ գոտիների վերականգնումն է ու ընդլայնումը, անտառային՝ բուֆերային գոտիների ստեղծումը։

Երևանում օդի աղտոտվածության խնդիրը ոչ միայն բնապահպանական է, այլև առողջապահական: Այս ուղղությամբ համայնքի ծրագրերը շարունակական են»,-ասված է հաղորդագրության մեջ:

Ըստ ոստիկանության օպերատիվ հաղորդագրությունների ամփոփագրերի՝ սեպտեմբերի 13-ից 16-ը ՆԳՆ ոստիկանության ստորաբաժանումները բացահայտել են հանցագործության 194 դեպք, որոնցից 1-ը՝ նախկինում կատարված:

Մասնավորապես՝ տրանսպորտային միջոց վարելու իրավունքից զրկված կամ այդ իրավունքը կասեցված կամ այդ իրավունքը չունեցող անձի կողմից տրանսպորտային միջոց վարելու՝ 28, մարմնական վնասվածք պատճառելու` 24, ֆիզիկական ներգործության և թմրանյութի հայտնաբերման ՝ 19-ական, հոգեկան ներգործության՝ 14, անձնական ունեցվածքի գողության ու խարդախության՝ 9-ական, սառը զենքի հայտաբերման՝ 8, խուլիգանության ՝ 7, գույքի ոչնչացման կամ վնասման՝ 6, փաստաթղթեր կեղծելու՝ 4, թմրանյութի իրացման՝ 5, սեքսուալ բնույթի բռնի գործողության և զենք-զինամթերքի առգրավման՝ 3-ական, մարդու առևանգման, բնակարանային գողության, շորթման, վստահված գույքի հափշտակման, աշխատանքի կանոնները խախտելու, ապօրինի կերպով քաղաքացիական ողորկափող հրազեն, գազային, օդաճնշիչ, սառը կամ նետողական զենք կրելու և շրջանառությունն արգելված թմրամիջոցներ, հոգեմետ, խիստ ներգործող կամ թունավոր նյութեր պարունակող բույսեր ցանելու կամ աճեցնելու՝ 2-ական, ավազակության, համակարգչային հափշտակության, պետական ունեցվածքի գողության, պաշտոնատար անձի ծառայողական գործունեությանը միջամտելու, կենդանիների նկատմամբ դաժան վերաբերմունքի, կաշառակերության, բուժաշխատողների կողմից մասնագիտական պարտակությունները չկատարելու, ինքնավնասման, անվտանգության պահանջներին չհամապատասխանող հումքերի կամ ապրանքների շրջանառության, աշխատանքների կատարման կամ ծառայությունների մատուցման, հողը փչացնելու, ֆիզիկական ուժեղ ցավ կամ հոգեկան ուժեղ տառապանք պատճառելու, ձերբակալվածներին կամ կալանավորվածներին պահելու վայրում կամ քրեակատարողական հիմնարկում կյանքին կամ առողջությանը վտագ ներկայացնող առարկաներ պատրաստելու, կողոպուտի, դրամանենգության, պաշտոնեական լիազորությունների չարաշահման, դատական ակտը չկատարելու, անձի տիրապետությունից դուրս եկած գույքին տիրանալու, աշխատանքային անվտանգության կանոնների խախտելու, երեխայի կյանքի անվտանգության ապահովման կամ առողջության պահպանման պարտականության ոչ պատշաճ կատարման՝ 1-ական դեպք։

Նախկինում կատարված հանցագործության դեպքերից բացահայտվել է անձնական ունեցվածքի գողության 1 դեպք։

Հայտնաբերվել է 12 հետախուզվող, կամավոր ներկայացել՝ 3-ը։

Հայտնաբերվել է 2 անհետ կորած։

Գրանցվել է զենք-զինամթերքի կամավոր հանձնման 2 դեպք։

Անցած 3 օրվա ընթացքում հանրապետությունում արձանագրվել է ճանապարհատրանսպորտային 45 պատահար, 5 մարդ զոհվել է, 61-ը՝ ստացել տարբեր աստsիճանի մարմնական վնասվածքներ։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Դատարանի սահմանած մեկ տարվա ազատազրկումն ամբողջությամբ կրելով՝ քաղբանտարկյալ Նարեկ Մալյանը հինգշաբթի օրը՝ սեպտեմբերի 19-ին, օրենքի ուժով ազատ է արձակվելու, այս մասին Ֆեյսբուքի իր  էջում գրել է փաստաբան Ռուբեն Մելիքյանը։

«Լրատվամիջոցներին, Մալյանի համախոհներին ու ընկերներին հայտնում եմ, որ ըստ ամենայնի՝ նա Վարդաշենի բանտից դուրս կգա ժամը 10:00-ին»,-նշել է նա։

Սեպտերբերի 16-ին ԱԽ քարտուղար Արմեն Գրիգորյանն ընդունել է Հայաստանի Հանրապետությունում Նիդերլանդների Թագավորության նորանշանակ դեսպան տիկին Մարիկե Մոնրոյ-Վինթերին:

ԱԽ քարտուղար Արմեն Գրիգորյանը շնորհավորել է դեսպանին պատասխանատու պաշտոնում նշանակվելու կապակցությամբ և հույս հայտնել, որ Հայաստան-Նիդերլանդներ երկկողմ հարաբերություններն ու համագործակցությունը կշարունակեն զարգանալ նույն ինտենսիվությամբ:  

Հանդիպմանը կողմերը քննարկել են ՀՀ-ՆԹ երկկողմ հարաբերությունների հետագա զարգացման հնարավորություններն ինչպես երկկողմ, այնպես էլ բազմակողմ հարթակներում: Վերոնշյալի շրջանակներում կարևորվել է Նիդերլանդների կողմից ցուցաբերվող շարունակական աջակցությունը Հայաստանում իրականացվող ժողովրդավարական բարեփոխումներին:

Սեպտեմբերի 12-ին ապօրինի թմրանյութ պահելու և օգտագործելու դեպք է բացահայտվել Երևանում։ Ինչպես հայտնում է Shamshyan.com-ը, Ժամը 23։45-ի սահմաններում ՀՀ ներքին գործերի նախարարության ոստիկանության Պարեկային ծառայության Երևան քաղաքի գնդի 2-րդ գումարտակի պարեկները թմրանյութ պահելու և օգտագործելու հիմնավոր կասկածանքով ձերբակալել և ոստիկանության Ավանի բաժանմունք են տեղափոխել Երևանի բնակիչ 31-ամյա Սարգիս Գ․-ին։

Սարգիս Գ․-ի մոտից անձնական խուզարկությամբ հայտնաբերվել է 1,93 և 1,43 գրամ ընդհանուր կշռով 2 հատ թղթյա փաթեթ՝ լցված դեղնականաչավուն զանգվածով և մոխրացված հետքերով 2 կաթոցիչ: Արդեն ոստիկանությունում Սարգիս Գ․-ն հայտնել է, որ հայտնաբերվածը հանդիսանում է «Մարիխուանա» տեսակի թմրամիջոց, ձեռք է բերել համացանցի «Տելեգրամ» հավելվածի միջոցով՝ իր օգտագործման համար: 

Դեպքի փաստով ոստիկանության Նոր Նորքի բաժնում փաստաթղթեր են կազմվել, որոնք Սարգիս Գ․-ի հետ միասին ներկայացվել են ՀՀ քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժին։  Սարգիս Գ․-ն ոստիկաններին հայտնել է, որ ինքը աշխատում է ՀՀ Կենտրոնական բանկում՝ որպես ինժեներ։

Այս պահին «Սրբազան շարժման վերլուծության վերագնահատումների, նաև հաջորդ փուլին անցնելու միջոցառումներ են ընթանում, և Բագրատ Սրբազանը հանդիպումներ է ունենում տարբեր քաղաքական ուժերի, անհատների հետ, հանդիպել է նախագահներին և այդ շրջանակներում հանդիպում տեղի ունեցավ ԱԺ-ում:

Այս մասին խորհրդարանում լրագրողների հետ զրույցում ասաց «Հայաստան» խմբակցության ղեկավար Սեյրան Օհանյանը՝ անդրադառնալով Սրբազանի և իրենց ֆրակցիայի հանդիպման նպատակներին:

Նա նշեց, որ քննարկել են ընդհանուր «Սրբազան շարժմանը» վերաբերող հարցեր, նշել են, որ իրենք՝ որպես ընդդիմադիր շարժում, մյուս ընդդիմադիր ուժերի հետ միասին աջակցել են Շարժմանը և շարունակելու են աջակցել:

«Անդրադարձել ենք գործիքակազմերին, որոնք վերաբերում են ԱԺ ընդդիմադիր խմբակցության գործողություններին, պայմանավորվել ենք, որ ապագայում ևս մեր աջակցությունը ցուցաբերելու ենք նաև Ազգային ժողովում:

Շարժման և՛ խորհուրդը, և՛ ղեկավարությունը, նաև մեր ժողովուրդը պիտի իմանան, որ յուրաքանչյուր պայքար պարունակում է համբերատար և համառ գործողություններ, և այդ պարագայում բոլորը պիտի իրենց դերակատարումն ունենան։ Նաև գտնում եմ, որ շատ ձգձգումներն էլ չպետք է լինեն, պետք է լինեն գործողություններ, որոնք պայքարը կհասցնեն վերջնական նպատակին»,-ասաց նա։

Օհանյանը նշեց, որ Շարժման օրակարգում բոլոր գործողությունները շարունակում են մնալ նույնը: «Բայց նաև Սրբազանն էլ է գիտակցում, որ ԱԺ-ում ընդդիմադիր խմբակցությունը կարող է գործել Շարժման արդյունքից ելնելով, այսինքն, պետք է լինի ժողովրդական լայն համախմբում»,- շեշտեց նա։

ԱՄՆ-ն և Եվրոպան պետք է մտածեն՝ ինչ կարող են անել Հայաստանի ժողովրդավարական զարգացմանը, հետագա բարգավաճմանն ու անվտանգության ապահովմանն աջակցելու համար. այս մասին ասել է ԵԱՀԿ-ում ԱՄՆ նախկին դեսպան, ներկայում «Քարնեգի» հիմնադրամի քաղաքական հետազոտությունների գծով ավագ փոխնախագահ Դեն Բաերն ԱՄՆ Կոնգրեսի Հելսինկյան հանձնաժողովի՝ Հայաստանին նվիրված լսումների ժամանակ:

«Նախ պետք է աջակցել Հայաստանի հարևանների հետ հարաբերությունների կարգավորմանը խաղաղությանը: Թեև դա քաղաքական առումով ցավոտ է լինելու, իսկ Մոսկվան էլ փորձելու է սաբոտաժի ենթարկել գործընթացը, սակայն Երևանի և Անկարայի միջև կարգավորումը, Հայաստանի և Ադրբեջանի միջև հարատև խաղաղությունն օգուտ կբերեն երեք երկրին էլ: Եթե նախագահ Էրդողանն ու վարչապետ Փաշինյանը քաջություն ու տեսլական դրսևորեն, հայ-թուրքական կարգավորմանը կարող է նախորդել Ադրբեջանի հետ վերջնական խաղաղության պայմանագրին և հեշտացնել (կնքումը-Խմբ.): Անվտանգային դիվիդենտներից զատ, Հայաստանը կկարողանա դիվերսիֆիկացնել իր տնտեսական գործընկերներին ու նվազեցնել կախվածությունը ՌԴ-ից»,- հավելել է դիվանագետը։

Բաերի խոսքով՝ հայ-թուրքական սահմանի բացումը կփոխի խաղի կանոնները, տարածաշրջանային առևտուրը Հայաստանի, Թուրքիայի, Ադրբեջանի և Վրաստանի միջև կարող է յուրանքանչյուր երկրում նպաստել տնտեության աճին։

Նա կարևորել է նաև տեխնիական հմտությունների կառուցումը, այդ թվում՝ առևտուրն ու լավ կառավարումը, գյուղատնտեսության ոլորտը, որտեղ ներդրումներն ու արդիականացումը կարող են օգնել նվազեցնել ՌԴ-ից ներկրումները։

«ԱՄՆ-ն պետք է համագործակցի ԵՄ-ի ու Հայաստանի մյուս ընկերների հետ՝ զարգացնելու երկարատև համապարփակ անվտանգային և պաշտպանական գործընկերություն: Դա պետք է տեղի ունենա  համաձայնագրերի տեսքով, որոնք արդեն կնքվել են Ուկրաինայի հետ անցյալ երկու տարվա ընթացքում։ Այս անվտանգային համաձայնագրերը հայերին վստահություն կտան այն պայմաններում, երբ նրանց ղեկավարները բարդ քայլեր են ձեռնարկում Մոսկվայից կախվածությունը նվազեցնելու և անկախ պետություն ունենալու ուղղությամբ։ Մոսկվան կփորձի առաջընթացին խանգարել»,- ասել է նա:

Բաերն ընդգծել է, որ «Արևմուտքի նպատակն է երկրի ազատ և անկախ ապագային աջակցելը, այլ ոչ թե Մոսկվայի դեմ միավորներ հավաքելը»:

«Այժմ նաև ժամանակն է ներկայացնելու իրատեսական սպասումները. սպասվող ճանապարհը լինելու է երկար: Պահանջվում են տևական կառուցվածքային բարեփոխումներ և ներդրումներ: Այն պահանջում է մի ամբողջ սերնդի աշխատանք: Մոսկվան, ամենայն հավանականությամբ, կփորձի խոչընդոտել գործընթացին... Հայերը պետք է պատրաստ լինեն դիմանալու ցուրտ ձմեռներին, իսկ մենք պետք է պատրաստ լինենք պահպանելու մեր տևական աջակցությունը»,- եզրափակել է Բաերը: