«Ավրորա» մրցանակի հավակնորդներից է Կենտրոնական Աֆրիկայի Հանրապետությունից Հայր Բերնար Կինվին, ում այսօր մրցանակաբաշխության ժամանակ ներկայացրեց Մարդու իրավունքների ոլորտում ՄԱԿ-ի գլխավոր քարտուղարի նախկին հատուկ ներկայացուցիչ Հինա Ջիլանին:
Նա մասնավորապես նշեց, որ իր համար մեծ պատիվ է ներկայացնել մի մարդու, ով ամեն օր աշխատում է այնքան դժվար պայմաններում, որ մրցանակաբաշխության նկարահանող խումբը մեծ դժվարությամբ կարողացավ կատարել իր աշխատանքը:
«Կենտրոնական Աֆրիկայի Հանրապետությունը վտանգավոր վայր է, որտեղ Հայր Բերնարը ամեն առավոտ բացում է իր եկեղեցու դռները` օգնելու նրանց, ովքեր դրա կարիքն ունեն, և դա անում է միայն մարդկությանը օգնելու դրդապատճառով, հոգու առատաձեռնության պատճառով` ընդդիմանալով վախին, սպառնալիքներին և մերժում է անջատողականությունը, թշնամությունը»,-ասաց նա:
Հայր Բեռնարդ Կինվին բարձրանալով բեմ՝ նշեց, որ իր համար մեծ պատիվ է ներկա լինել այս սիրո մրցանակաբաշխությանը:
«Այս մրցանակաբաշխությունը հաստատում է, որ միայն սերը կարող է քանդել ատելության պատերը… Մենք բոլորս մեկ ընդհանուր հասարակության անդամ ենք, մենք բոլորս մեկ աշխարհի անդամ ենք»,-ասաց նա: