Կանադայի Բրիտանական Կոլումբիա նահանգում անտառային հրդեհների պատճառով բնակչության տարհանում է իրականացվում, հայտնում է CTV հեռուստաալիքը։
Անտառներն այրվում են շրջանի հյուսիսում և հյուսիս-արևելքում: Անվտանգ վայր է տեղափոխվել մոտ 1.000 մարդ:
Բրիտանական Կոլումբիայում հրդեհների ընդհանուր տարածքը կազմում է մոտ 30.000 հա: Հաղորդվում է, որ կրակը կարող է տեղափոխվել հարևան Ալբերտա նահանգի հյուսիս-արևմտյան շրջան:
Ալբերտա նահանգում՝ հյուսիս-արևելյան շրջանում, նախորդ կիրակի օրվանից նույնպես անտառներ են այրվում: Երեքշաբթի ուժեղ քամու պատճառով հրդեհներն այս շրջանում սկսել են արագորեն տարածվել:
Մայիսի 3-ից ի վեր այդ շրջանում արդեն տարհանվել է մոտ 90.000 մարդ: Ամենաշատը տուժել է Ֆորտ ՄքՄյուրեյ քաղաքը, որտեղ, պաշտոնական տվյալներով, մոտ 1.600 տուն է հրդեհվել: Քաղաքի ամբողջ բնակչությունը` ավելի քան 80.000 մարդ, լքել է այն:
