ԱԺ «Օրինաց երկիր» խմբակցության պատգամավոր Հովհաննես Մարգարյանն այսօր «Գործընկերություն հանուն բաց հասարակության» կողմից հրավիրված ՀՀ նոր ընտրական օրենսգրքի և ընտրական իրավունքի իրացման հիմնախնդիրներին նվիրված քննարկմանը հայտարարեց, որ այսօր հասարակությունը պահանջում է՝ արդար ընտրություններ, որի դեպքում հնարավորինս ապահովվի քվեարկության գաղտնիությունը։
«Երկրորդ կարևոր խնդիրը կրկնաքվեարկությունն է, որը բացառելու համար անհրաժեշտ է հրապարակել քվեարկածների ցուցակները և թվով 2000 ընտրատեղամասեր կարողանան փակցնել դրանք պատին։ Երկրորդ խնդիրն այն է, որ թե ովքեր են ամփոփում ընտրության արդյունքները. 7 հոգի, այնինչ դրանք կարող են անել մարզային ընտրական հանձնաժողովները։ Հենց այս խնդրի պատճառով է, որ մենք թյուրիմացություններ են ունենում՝ մի գյուղում քվեարկածների թիվը գերազանցում է բնակիչների թիվը»,- ասաց նա։
Այնուհետև Հովհաննես Մարգարյանն անդրադարձավ ռեյտինգային քվեարկությանը և ասաց, որ չի կարելի ասել, թե անցում ենք կատարում համամասնական ընտրակարգի, որովհետև ռեյտինգային քվեարկությունը մեծացնում է մեծամասնականի քանակը։
«Ամբողջ նախագիծը նման է մի ասացվածքի՝ նկարիչը ներկայացնում է մի նկար, հարցնում են, թե ինչ է նկարված, ասում է՝ չե՞ս տեսնում կովը խոտ է կերել, ասում է՝ խոտը ուր է, պատասխանում է՝ կովը կերել է, ասում է՝ բա կովն ուր է, պատասխանում է՝ որ կերել վերջացրել է մնա ինչ անի։ Հիմա այս նախագիծը նման է սրան»,- ասաց նա։