Հացահատիկի գործարքից դուրս գալուց հետո Ռուսաստանը գնալով ստիպված է լինում օգտագործել «ստվերային նավատորմը»՝ հին ու փոքր նավերը, որոնք շահագործվում են քիչ հայտնի նավերի օպերատորների կողմից, գյուղատնտեսական ապրանքներ արտահանելու համար։ Այս մասին գրել է Reuters-ը՝ վկայակոչելով ծովային տասը ապահովագրողների, թրեյդերների և բեռնափոխադրող ընկերություններ հետ զրույցների ընթացքում ձեռք բերված տվյալները:

Նավագնացության ոլորտում երեք աղբյուրներ գործակալությանը հայտնել են, որ թուրքական ու չինական ընկերությունները սովորաբար շահագործում են ռուսական «ստվերային նավատորմը»:

Ըստ Shipfix հարթակի՝ հուլիսին Ռուսաստանի Դաշնությունը սկսել է ակտիվորեն վարձակալել նավեր փոքր կազմակերպություններից, որոնց հետ միջազգային խոշոր թրեյդերները չեն աշխատում։ Գյուղմթերքների արտահանման համար նավերի վարձակալման ռուսական հայտերի թիվը հուլիսին աճել է 40%-ով՝ հասնելով 257-ի։

Գործակալության երեք աղբյուրներ հայտնել են, որ Սև ծովի նավահանգիստներ մեկնող ռուսական նավերի ապահովագրությունը Ռուսաստանին ամեն օր արժենում է տասնյակ հազարավոր դոլարների պրեմիալներ։

Նշվում է, որ վերջին օրերին Սև ծովում ռազմական գործողությունների ակտիվացման պատճառով ապահովագրական դրույքաչափն աճել է։ Իրավիճակին ծանոթ աղբյուրը Reuters-ին ասել է, որ օպերատորները օրական 10,000 դոլարով ավելի են պահանջում ռուսական ապրանքների տեղափոխման համար, քան Բուլղարիայից և Ռումինիայից ապրանքների նմանատիպ բեռնափոխադրումների համար։

Ռուսաստանի հացահատիկ արտահանողների միության ղեկավար Էդուարդ Զերնինը գործակալությանը հայտնել է, որ բեռնափոխադրումների և ապահովագրության ծախսերի աճը կարող է հանգեցնել գյուղատնտեսական ապրանքների համաշխարհային գների բարձրացման։ Երկու անանուն աղբյուրներ գործակալությանը հայտնել են, որ Սև ծովում էսկալացիան, ամենայն հավանականությամբ, կհանգեցնի Ռուսաստանից հացահատիկի արտահանման նվազմանը։

Ռուսաստանի գյուղատնտեսության նախարարությունը Reuters-ին հայտնել է, որ 2023/24 սեզոնին կանխատեսում է ռուսական հացահատիկի արտահանման 8% անկում՝ նախորդ սեզոնի համեմատ։ Զերնինը կանխատեսում է արտահանման անկում 44-45 մլն տոննայով։

Reuters-ը, հղում անելով VesselsValue-ին, նշել է, որ շատ ռուսական չոր բեռնատար նավերի տարիքը (շահագործվող 31-ից) ավելի քան 30 տարեկան է, ինչը դժվարացնում է որոշ նավահանգիստների մուտքը, որտեղ պահանջները խստացվում են՝ կախված նավի տարիքից։

Արցախում ր սննդամթերքի և առաջին անհրաժեշտության այլ ապրանքատեսակների տրամադրման նպատակով քաղաքացիների կողմից ներկայացվող դիմումների ընդունումը ս.թ. օգոստոսի 9-ից ժամանակավորապես կդադարեցվի: Այս մասին հայտնել է Արցախի սոցիալական զարգացման և միգրացիայի նախարարությունը։

Նախարարությունը նշել է, որ դիմումների ընդունման գործընթացի վերսկսման վերաբերյալ տեղեկատվությունը հաղորդի հավելյալ:

Արցախի գյուղատնտեսության նախարարությունը հորդորում և պահանջում է կենդանիների և մսի վաճառք իրականացնող տնտեսավարողներին նշված ապրանքների իրացումը պարտադիր իրականացնել պահանջվող ուղեկցող փաստաթղթերի առկայությամբ՝ տեղեկանք համայնքի ղեկավարից՝ կենդանու պատկանելության մասին և տեղեկանք համայնքը սպասարկող անասնաբույժից, որը տրվում է կենդանու՝ նախասպանդային և հետսպանդային զննության իրականացումից հետո:

«Միաժամանակ տեղեկացնում ենք, որ հանրապետության որոշ տարածքներում արձանագրվել են «խոզերի աֆրիկական ժանտախտ» հիվանդության օջախներ, ուստի կոչ ենք անում խստիվ պահպանել խոզի մսի իրացման բոլոր սանիտարահիգիենիկ նորմերը, ներառյալ վերը նշված փաստաթղթերի առկայությունը՝ հիվանդության հետագա տարածումը կանխարգելելու նպատակով:

Առանց ուղեկցող անասնաբուժական փաստաթղթերի կենդանիների ու մսի վաճառքը հղի է ազգաբնակչության առողջության համար մի շարք վտանգներով, ուստի հորդորում ենք սպառողներին նախքան մսի ձեռքբերումը պահանջել վաճառողից համապատասխան տեղեկանքների առկայությունը:

Իրազեկում ենք նաև, որ տեղծված իրավիճակում, վառելիքի սղությամբ պայմանավորված, հարյուր տոկոս պետական մասնակցությամբ գործում է «Պրոդսերվիս» ՓԲԸ, որը կազմակերպում է համայնքներից գյուղատնտեսական մթերքների, այդ թվում՝ մսի ձեռքբերման ու մայրաքաղաքի բնակչությանը մատակարարման աշխատանքները:

Ուստի կենդանիների և մսի վաճառք իրականացնող տնտեսավարողները լրացուցիչ հոգսերից խուսափելու նպատակով կարող են վաճառքն իրականացնել նշված ընկերության միջոցով:

Զգուշացում. առանց պահանջվող ուղեկցող փաստաթղթերի կենդանիների և մսի իրացում իրականացնողները սահմանված կարգով կենթարկվեն պատասխանատվության»,- ասված է հաղորդագրության մեջ:

Մարդու իրավունքների պաշտպան Անահիտ Մանասյանի հանձնարարությամբ այսօր՝ օգոստոսի 8-ին, աշխատակազմի արագ արձագանքման խմբերը մեկնել են Երևան քաղաքի ոստիկանության բաժիններ՝ Կառավարության շենքի մոտ ակցիա իրականացնող քաղաքացիներին բերման ենթարկելու դեպքի շրջանակներում: Այս մասին հայտնել է ՄԻՊ գրասենյակը։

Տեղի կունենան առանձնազրույցներ բերման ենթարկված քաղաքացիների հետ, կուսումնասիրվեն նրանց բերման ենթարկելու հիմքերն ու իրավունքների ապահովման վիճակը, ինչպես նաև այդ առնչությամբ Ոստիկանությունում կազմված փաստաթղթերը:

«Մանրամասների վերաբերյալ ՄԻՊ աշխատակազմը հանդես կգա լրացուցիչ հաղորդագրությամբ»,- ասված է հաղորդագրության մեջ:

ՀՀ ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանն ու փոխնախագահ Արմեն Խաչատրյանն օգոստոսի 8-ին ԱԺ-ում հանդիպել են ՀՀ-ում Չինաստանի Ժողովրդական Հանրապետության դեսպան Ֆան Յոնգին, ՉԺՀ դեսպանության պաշտպանական հարցերով ռազմական կցորդ, ավագ գնդապետ Ան Ցյանին ու դեսպանատան պատվիրակությանը: Այս մասին հայտնել է խորհրդարանի մամուլի ծառայությունը։

Հանձնաժողովի նախագահը հյուրերին «շնորհակալություն է հայտնել հանդիպման և երկու երկրների համագործակցության համար, կարևորել կրթական ծրագրերի իրականացումը հատկապես ռազմական բլոկում»:

«Դեռ 1990-ականներին Պաշտպանության նախարար Վազգեն Սարգսյանի այցը ՉԺՀ շատ էր կարևորվել, այդ իսկ պատճառով այն ժամանակ մենք ռազմական օգնություն ստացանք: Նույն գործելաոճը դեռ շարունակվում է: 44-օրյա պատերազմից հետո մեր երկիրը փորձում է վեր հանել պարտության դասերը: Խաղաղության հասնելու համար մինչ օրս մեծ ջանքեր ենք գործադրում: Որպեսզի Չինական պարսպի տակ, ու, առհասարակ, աշխարհում խաղաղություն տիրի, պետք է, որ Հարավային Կովկասում խաղաղ լինի»,- ասել է ԱԺ պաշտպանության և անվտանգության հարցերի մշտական հանձնաժողովի նախագահը:

«Այս համատեքստում Անդրանիկ Քոչարյանը նշել է, որ մեր երկրի անվտանգային համակարգն ապահովում է ոչ միայն բանակը, այլեւ Ներքին գործերի նախարարությունը, Արտաքին հետախուզական ծառայությունն ու Ազգային անվտանգության ծառայությունը:

ԱԺ պաշտպանության եւ անվտանգության հարցերի մշտական հանձնաժողովի նախագահն անդրադարձ է կատարել նաև ԼՂ-ում ստեղծված իրավիճակին:

«Լեռնային Ղարաբաղի մեր հայրենակիցներն ամիսներ շարունակ շրջափակման մեջ են. ռազմական գործողությունները բացառելով՝ պետք է կարողանանք խնդրին լուծում տալ»,- ասել է պատգամավորը:

ՀՀ-ում Չինաստանի Ժողովրդական Հանրապետության դեսպան Ֆան Յոնգը Հայաստանի խորհրդարանականներին հայտնել է, որ հայ-չինական հարաբերություններում զարգացման դինամիկա կա: Դեսպանը նկատել է նաև, որ տարածաշրջանում ու հատկապես Հայաստանում խաղաղության հասնելու ճանապարհներ է պետք գտնել, ուստի պետք է զարգացնել անվտանգային ոլորտի համագործակցությունը:

ԱԺ պաշտպանության եւ անվտանգության հարցերի մշտական հանձնաժողովի փոխնախագահ Արմեն Խաչատրյանը շնորհակալություն է հայտնել հյուրերին անվտանգային համակարգի համագործակցությունը բարձր գնահատելու համար:

«Չինաստանի համար ևս կարևոր է, որ Հայաստանում խաղաղ լինի, ուստի գործուն քայլերի է պետք անցնել»,- ասել է հանձնաժողովի փոխնախագահը:

Հանդիպման ընթացքում քննարկվել են ռազմական ոլորտի բարեփոխումներին, հայ-չինական հարաբերություններն ու երկու երկրների ԱԺ-ների միջեւ համագործակցությունը զարգացնելուն ուղղված հարցեր: Պայմանավորվածություն է ձեռք բերվել, որ նման հանդիպումները շարունակական կլինեն»,- ասված է հաղորդագրության մեջ:

Լիբանանի խորհրդարանի ներկայացուցիչ Հակոբ Բագրատունին շնորհավորական նամակով հաջողություններ է մաղթել Արցախի Ազգային ժողովի նորընտիր նախագահ Դավիթ Իշխանյանին։

Նամակում ասվում է․

 «Մեծայարգ Տիար Դավիթ Իշխանեան                  

Արցախի Հանրապետութեան

Ազգային Ժողովի Նախագահ

Սիրելի պրն. Իշխանեան,

Մեծ գոհունակութեամբ ստացանք Արցախի Հանրապետութեան Ազգային Ժողովի նախագահի պաշտօնին Ձեր ընտրութեան լուրը:

Մեր բոլորին արծուեբոյնը հանդիսացող Արցախի Ազգային Ժողովի նախագահի Ձեր այս պաշտօնը, ներկայ ամենատագնապալի հանգրուանին անգամ մը ևս կը վերահաստատէ պատասխանատուութեան այն վեհ գիտակցութիւնը, որ դուք ցուցաբերած էք Արցախի համար, մեր ժողովուրդի պայքարին Ձեր անվիճելի դերակատարութեամբ:

Ձեր այս նոր պաշտօնը, զոհաբերութեան եւ պատասխանատուութեան նոր մարտահրաւէրներու դէմ յանդիման կը դնէ Ձեզ եւ ձեր ներկայացուցած կազմակերպութիւնը:

Իբրեւ Լիբանանի խորհրդարանի հայկական երեսփոխանական համախմբումի ներկայացուցիչ ի սրտէ յաջողութիւն կը մաղթենք Ձեր աշխատանքներուն և վստահութեամբ կ'արձանագրենք, որ լաւագոյնս պիտի կարենաք արտայայտել ազատ Արցախի ազատատենչ ժողովուրդին ազատ և ինքնիշխան ապրելու կամքը:

Յաջողութեան և անվտանգութեան լավագոյն մաղթանքներով՝

Յակոբ Բագրատունի Ներկայացուցիչ`

Լիբանանի խորհրդարանի Հայկական երեսփոխանական համախմբումի»

Ասկերանի շրջանում արձանագրվել է հրադադարի ռեժիմի մեկ խախտում։ Այս մասին հայտնել է ՌԴ պաշտպանության նախարարությունը ռուսական խաղաղապահ առաքելության մասին ամենօրյա տեղեկագրում։

Տուժածներ չկան։ «Ռուսական խաղաղապահ զորախմբի հրամանատարությունը ադրբեջանական ու հայկական կողմերի հետ հետաքննություն է անցկացնում այս փաստի առնչությամբ։

Մարտակերտի, Մարտունու և Շուշիի շրջաններում պարեկություն է իրականացվել երեք երթուղիներով»,- ասվում է հաղորդագրության մեջ։

Օգոստոսի 8-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է Մեսրոպ Մաշտոցի անվան Մատենադարանի նորընտիր տնօրեն Արա Խզմալյանին և գիտական գծով փոխտնօրեն Վահե Թորոսյանին: Այս մասին հայտնել է Մայր Աթոռի տեղեկատվական համակարգը։

«Նորին Սրբությունը, շնորհավորելով Մատենադարանում նոր պաշտոնների ստանձման առիթով, նրանց մաղթեց արդյունաշատ գործունեություն ի պայծառություն և ի փառս Մաշտոցյան Մատենադարանի:

Վեհափառ Հայրապետն ընդգծեց, որ Մատենադարանն ազգային հպարտության ամենանվիրական կենտրոններից մեկն է՝ իր ձեռագրական ժառանգությամբ հանդիսանալով համամարդկային գիտական ու իմացական մտքի զարգացման աղբյուր։

Իր հերթին պրն. Խզմալյանը Նորին Սրբությանը ներկայացրեց Մատենադարանի զարգացմանն ուղղված տեսլականը և առաջիկա ծրագրերը՝ կարևորելով նաև Հայ Եկեղեցու աջակցությունը։

Զրույցի ընթացքում քննարկվեցին փոխհամագործակցության ուղիները, մեծապես կարևորվեց ձեռագրագիտական, աղբյուրագիտական ու թարգմանական առավել բեղուն աշխատանքների իրագործումը: Առաջնահերթ խնդիրներից մեկը շեշտվեց՝ հայկական ձեռագրերի վերադարձը հայրենիք»,- ասված է հաղորդագրության մեջ։

«Ժողովուրդ» օրաթերթը գրում է. «Երևանի նախկին քաղաքապետ Հայկ Մարությանը երեկ պաշտոնապես հայտարարեց, որ մասնակցելու է ավագանու ընտրություններին՝ «Ազգային առաջընթաց» կուսակցության ցուցակով:

Ինչպես մեր աղբյուրներն են փոխանցում՝ Հայկ Մարությանը երկար քննարկումներից հետո է վերջնական որոշում կայացրել, ընդ որում, նրա մտերիմներն էլ են միայն երեկ իմացել վերջնական որոշման մասին: Այս առիթով պետք է նշել, որ հենց իր ամենամտերիմ անձանցից շատերը, մեղմ ասած, ապշած էին Հայկի որոշումից, քանի որ գիտակցում էին, որ Մարությանի հիմնական շարժաառիթը ոչ թե երևանի ապագա շենացումն է, այլ ընդամենը մանր վրեժխնդրությունը գործող իշխանությունների նկատմամբ: Սակայն, ի հեճուկս բազմաթիվ հորդորների, «քաղաքապետը» որոշել իր ներկայացումը այս անգամ խաղալ երևանի փողոցներում, ակնկալելով ծափեր և ծաղիկներ:

Մարությանին մոտ կանգնած մարդիկ տարբեր հավաքների ժամանակ անկեղծանում են , որ Հայկն ինքն էլ գիտի, որ իր պաշտոնավարման ընթացքում եղած չարաշահումների մի քանի գործերով քննություններ են գնում, այդ թվում իր կնոջ՝ Իվա Մարությանը մասնակցությամբ: Ոսւտի որոշել է դիմել խորամանկ քայլի. Մասնակցել ավագանու ընտրություններին, հնարովորինս քաղաքականցնել բոլոր քրեական գործերը և թաքցնելով իր ներքին վախերը և սրտի դողը, փորձել երևանցիներին հրամցնել «իրական հեղափոխական» լինելու թեզը»:

Մանրամասները՝ «Ժողովուրդ» օրաթերթի այսօրվա համարում:

«Ժողովուրդ» օրաթերթը գրում է. ««Ժողովուրդ» օրաթերթի տեղեկություններով՝ իշխող «Քաղաքացիական պայմանագիր» կուսակցության նախընտրական շտաբը գործելու է օգոստոսի 23-ից՝ քարոզարշավի մեկնարկին զուգահեռ:

Ինչպես հայտնի է, ՔՊ գլխավոր շտաբը Հյուսիսային պողոտայում է գտնվում. գրասենյակը դեռ պատրաստ չէ, այս պահին այնտեղ վերանորոգման աշխատանքներ են ընթանում, ինչով պայմանավորված՝ կուսակցությունում խառն են: Մեր տեղեկություններով՝ գրասենյակի նորոգման աշխատանքները եւս Արմեն Փամբուխչյանն է անձամբ համակարգում:

Շտաբի բացվելուց հետո արդեն պարբերաբար այնտեղ հավաքներ, քննարկումներ կլինեն՝ ավագանու ընտրությունների հետ կապված:

Գլխավոր շտաբը բացելուց հետո արդեն ամեն վարչական շրջանում շտաբներ կբացվեն, որոնք կկորդինացվեն Արմեն Փամբուխչյանի կողմից»:

Մանրամասները՝ թերթի այսօրվա համարում:

Օգոստոսի 8-ին, ժամը 20։35-ին Սյունիքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Անգեղակոթ-Սպանդարյան ավտոճանապարհին տեղի է ունեցել ՃՏՊ. անհրաժեշտ է փրկարարների օգնությունը:

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ Սիսիան-Սպանդարյան ավտոճանապարհի մոտ 18-րդ կմ-ին բախվել են «Honda» մակնիշի (վարորդ՝ Հ. Հ., ծնված 1989 թ.) և «Ford» մակնիշի բեռնատար (վարորդ՝ Ա. Բ., ծնված 1959 թ.) ավտոմեքենաները, ինչի հետևանքով վերջինս դուրս է եկել ճանապարհի երթևեկելի հատվածից և կողաշրջվել:

Մինչ փրկարարների կանչի վայր հասնելը՝ վարորդ Ա. Բ.-ի դին դուրս է բերվել ավտոմեքենայից, իսկ ուղևորներ Ս. Բ.-ն (ծնված 1963 թ.) և Ա. Ս.-ն (ծնված 1962 թ.) հոսպիտալացվել են Սիսիան քաղաքի ԲԿ, որտեղ նրանց առողջական վիճակը բժիշկները գնահատել են միջին ծանրության:

Փրկարարները հոսանքազրկել են ավտոմեքենան:

«Ժողովուրդ» օրաթերթը գրում է. «Երևան քաղաքի առաջին ատյանի ընդհանուր իրավասության դատարանի դատավոր Մանվել Շահվերդյանը, որը Նիկոլ Փաշինյանի որդու մասնակցությամբ դատական գործի վճիռը կայացնողն է, հիփոթեքով ձեռք է բերել Շենգավիթ վարչական շրջանում նոր բնակարան՝ 42 մլն 097 հազար դրամ արժողությամբ։ Բացի այդ, նա 1985 թվականին բնակարան է գնել Արարատ քաղաքում, իսկ 2010 թվականին՝ Շենգավիթում։ Դատավորը հայտարարագրել է ավտոտնակ, որ իրեն չի պատկանում, սակայն շահագործվում է դատավորի կողմից։

Դատավորը հայտարարագրել է 2 մեքենա՝ MAZDA մակնիշի, որը ձեռք է բերվել 2019 թվականին, և OPEL մակնիշի՝ 2008 թվականին ձեռք բերված։ Բանկային հաշիվների մնացորդները կազմել են 100 հազար դրամ, կանխիկ դրամական միջոցները՝ 2 մլն 400 հազար դրամ։ Նրա հաշվետու տարվա եկամուտները կազմել են 12 մլն 214 հազար դրամ, որից 8 մլն 844 հազար դրամը աշխատանքի վարձատրություն է ՀՀ ԲԴԽ աշխատակազմի դատական դեպարտամենտից, իսկ պետական բյուջեից դատավորը ստացել է 2 մլն 966 հազար դրամ, որը եկամտահարկի վերադարձի սկզբունքով գումարի վերադարձ է։ Ստացված վարկերի և փոխառությունների մայր գումարի մնացորդը հաշվետու տարվա դեկտեմբերի 31-ի դրությամբ կազմել է 46 մլն 363 հազար դրամ»։

Մանրամասները՝ թերթի այսօրվա համարում:

«Ժողովուրդ» օրաթերթը գրում է ««Ժողովուրդ» օրաթերթի տեղեկությունների համաձայն՝ ՀՀ ԱՆ քրեակատարողական ծառայության պետի՝ պաշտոնից ազատվելուց հետո գործընթացները ոլորտում դեռ չեն ավարտվել: Ծառայության պետ, ՔՊ նախկին պատգամավոր Սերգեյ Ատոմյանին աշխատանքից ազատելուց հետո առաջիկայում կալանավորումներ են սպասվում քրեակատարողական հիմնարկներում: Ասել է թե՝ Ատոմյանի ենթակայության տակ աշխատած համակարգում աշխատակիցները գործարքների մեջ են եղել կալանավորների հետ, Ատոմյանը կա՛մ չի տիրապետել իրավիճակին, կա՛մ էլ մասնակից է եղել գործարքներին: Իրավապահները բացահայտումներ են արել: «Ժողովուրդ» օրաթերթի իրազեկ աղբյուրները տեղեկացնում են, որ առաջիկայում քրեակատարողական հիմնարկներից կալանավորումներ են սպասվում:

Հիշեցնենք, որ օգոստոսի 5-ին ՀՀ վարչապետ Նիկոլ Փաշինյանը որոշում է ստորագրել Սերգեյ Ատոմյանին Քրեակատարողական ծառայության պետի պաշտոնից ազատելու մասին»:

Մանրամասները՝ թերթի այսօրվա համարում:

Ադրբեջանի կողմից ԿԽՄԿ-ի գործունեության մշտական խոչընդոտումը և վերջինիս պաշտպանության տակ գտնվող բուժառուի առևանգումն անընդունելի են և պետք է դատապարտվեն։

Այս մասին իր թվիթերյան միկրոբլոգում գրել է ՀՀ արտաքին գործերի նախարարության մամուլի խոսնակ Անի Բադալյանը։

«Մենք գնահատում ենք Կարմիր խաչի միջազգային կոմիտեի մարդասիրական դերը Լեռնային Ղարաբաղում, դրա համար ընդգծում ենք, որ Ադրբեջանի կողմից դրա գործունեության մշտական խոչընդոտումը և ԿԽՄԿ-ի պաշտպանության տակ գտնվող բուժառուի առևանգումն անընդունելի են և պետք է դատապարտվեն։ Ավելի քան 1760 մարդ զրկված է բուժօգնությունից, հազարավոր մարդիկ դեղորայք չունեն»,- գրել է նա:

Օգոստոսի 8-ին, ժամը 21։24-ին Կոտայքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Երևան-Սևան ավտոճանապարհին՝ Քաղսի գյուղի կամրջի մոտ, տեղի է ունեցել ՃՏՊ. կա տուժած:

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ Երևան-Սևան ավտոճանապարհի 41-րդ կմ-ին բախվել են «Opel Vectra» (վարորդ՝ Դ. Գ.) և «Chrysler» (վարորդ՝ Մ. Հ., ծնված 1994 թ․) մակնիշների ավտոմեքենաները:

Փրկարարները հոսանքազրկել են ավտոմեքենաները, կատարել ճանապարհի լվացման աշխատանքներ, «Opel Vectra» մակնիշի ավտոմեքենայի վարորդին դուրս բերել և մոտեցրել շտապօգնության մեքենային. վերջինս հոսպիտալացման ճանապարհին մահացել է:

«Ժողովուրդ» օրաթերթը գրում է. «ՀՀ գլխավոր դատախազ Աննա Վարդապետյանի գործողությունները համակարգում շարունակում են զարմանքի տեղիք տալ: «Ժողովուրդ» օրաթերթի տեղեկությունների համաձայն՝ Վարդապետյանը Գլխավոր դատախազության 5 վարչությունների վերահսկողություն իրականացնելը հանձնարարել է իր տեղակալ Արթուր Պողոսյանին, սակայն ամիսներ անց իրավիճակ է փոխվել: Մեզ հասած տեղեկություններով՝ Արթուր Պողոսյանի ձեռքից նա վերցրել է Ազգային անվտանգության ծառայության եւ Հակակոռուպցիոն կոմիտեի նկատմամբ վերահսկողություն իրականացնելու լիազորությունները եւ անձամբ է վերահսկում դրանք:

Այսինքն՝ ՀՀ գլխավոր դատախազն է այս երկու նախաքննական մարմինների նկատմամբ ուղիղ վերահսկողություն իրականացնում: Ինչո՞ւ նա չի վստահում իր տեղակալ Պողոսյանին. այս հարցի պատասխանը ստանալու համար «Ժողովուրդ» օրաթերթը դիմեց ՀՀ ՀՀ Գլխավոր դատախազություն, որտեղից տրամադրեցին 2023 թվականի հունիսի 19-ին դատախազության պաշտոնական կայքէջում հրապարակված՝ ՀՀ գլխավոր դատախազի համապատասխան հրամանը, որով աշխատանքի բաժանում է կատարվել գլխավոր դատախազի, տեղակալների, ավագ դատախազների եւ դատախազների միջեւ: Գլխավոր դատախազությունից նշեցին, որ սա աշխատանքային գործընթաց է՝ պայմանավորված աշխատանքային ծանրաբեռնվածությունը հավասարաչափ բաշխելով: Ասել է թե՝ չհերքեցին մեր տեղեկությունները»:

Մանրամասները՝ թերթի այսօրվա համարում:

Փրկարար ծառայությունը տեղեկացնում է, որ ՀՀ տարածքում ավտոճանապարհներն անցանելի են։

Հունիսի 1-ից հիմնանորոգման աշխատանքներով պայմանավորված՝ Ալավերդի-Սանահին-Սարահարթ ճանապարհահատվածին գործում են երթևեկության սահմանափակումներ:

Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար:

Իսպանական Լա լիգայի չեմպիոն կատալոնական «Բարսելոնան» ակումբի հիմնադիր Ժոան Գամպերի անվան գավաթի համար խաղում 4։2 հաշվով հաղթեց անգլիական «Տոտենհեմին»:

3-րդ րոպեին Լեվանդովսկին առաջ մղեց իսպանական թիմին։ Մինչը ընդմիջման գնալը Օլիվեր Սկիպը դուբլի հեղինակ դարձավ ու առաջ մղեց անգլիական թիմին։

81-րդ րոպեիՆ Ֆերան Տորեսը վերականգնեց հաշվի հավասարակշռությունը։ Հիմնական ժամանակի վերջին րոպեին Ֆատին առաջ մղեց կատալոնյան թիմին, իսկ 3 րոպե անց Էզալզուին հաշիվը դարձրեց 4։2։

Ռուս զինվորականներին հաջողվել է կասեցնել անօդաչու թռչող սարքերի միջոցով Մերձմոսկվայում ահաբեկչություն իրականացնելու Կիևի փորձը։ ԱԹՍ-ները ոչնչացվել են ՀՕՊ համակարգերի կողմից, զոհեր ու ավերածություններ չկան։ Այս մասին հաղորդում է ՌԻԱ Նովոստին՝ ՌԴ պաշտպանության նախարարության մամուլի ծառայությանը հղումով։

Ավելի վաղ Մոսկվայի քաղաքապետ Սերգեյ Սոբյանինն իր թելեգրամյան ալիքում գրել էր, որ ՀՕՊ համակարգերը երկու մարտական անօդաչու թռչող սարք են խոցել, որոնք փորձում էին մոտենալ ՌԴ մայրաքաղաքին։ ԱԹՍ-ներից մեկը խոցվել է Դոմոդեդովոյի շրջանում, երկրորդը՝ Մինսկի մայրուղու տարածքում։

«Այս գիշեր Մոսկվայի շրջանի տարածքում Կիևի ռեժիմի կողմից անօդաչու թռչող սարքերով ահաբեկչություն իրականացնելու փորձը կասեցվել է։ ՀՕՊ համակարգերի կողմից ոչնչացվել է երկու անօդաչու թռչող սարք»,- ասված է ՌԴ ՊՆ-ի տարածած հաղորդագրության մեջ։

Երևան քաղաքի Մալաթիա-Սեբաստիա վարչական շրջանի դատախազության կողմից պետական (համայնքային) շահերի պաշտպանության ուսումնասիրության շրջանակում արձանագրվել են օտարման ոչ ենթակա ընդհանուր օգտագործման հողերը սեփականության իրավունքով քաղաքացիներին և իրավաբանական անձանց օտարելու դեպքեր: Այս մասին հայտնում են ՀՀ դատախազությունից։

2023 թվականի մայիս-հունիս ամիսներին Դատախազությունը մի շարք հայցադիմումներ է ներկայացրել ՀՀ վարչական և հակակոռուպցիոն դատարաններ:

Մասնավորապես՝

• Րաֆֆի 22 հասցեում գտնվող Վահան Զատիկյանի անվան այգու 290.0 քմ մակերեսով հողամասում կառուցված 571.8 քմ մակերեսով ինքնակամ կառույցը Երևանի քաղաքապետի 2011 թվականի նոյեմբերի 16-ի որոշմամբ՝ համարվել է Երևանի սեփականություն, և հաջորդ տարի Մ.Շ.-ն, որպես սեփականություն, Երևան համայնքից ձեռք է բերել հողամասն ու շինությունը: Օրենսդրության պահանջների խախտմամբ կայացված որոշումն անվավեր ճանաչելու նպատակով Դատախազությունը հայցադիմում է ներկայացրել Վարչական դատարան:

• Երևանի քաղաքապետի 2010 թվականի հուլիսի 22-ի 3388-Ա որոշմամբ՝ օտարվել են Անդրանիկի 121/8 հասցեում, իսկ 2013 թվականի մայիսի 17-ի 2480-Ա որոշմամբ՝ Անդրանիկի 123/5 և 121/8 հասցեներում գտնվող «Իտալական» այգու հողամասերը, այն դեպքում, երբ Հողային օրենսգրքի 60-րդ հոդվածի 6-րդ կետի հիմքով՝ բնակավայրերում ընդհանուր օգտագործման հողերն արգելվում է սեփականության իրավունքով փոխանցել քաղաքացիներին և իրավաբանական անձանց: Մալաթիա-Սեբաստիա վարչական շրջանի դատախազությունը Երևանի քաղաքապետի որոշումներն անվավեր ճանաչելու պահանջով 3 հայցադիմում է ներկայացրել Վարչական դատարան:

• Հակակոռուպցիոն դատարան է ներկայացվել ոչ գույքային պահանջներով 2 հայցադիմում՝ Անդրանիկի 43 հասցեի և դրան հարակից տարածքներում ինքնակամ կառույցները քանդելու պահանջով, քանի որ ինքնակամ կառույցները հետագայում ևս Հողային օրենսգրքի սահմանափակումներով պայմանավորված՝ ենթակա չէին օրինականացման:

• Երևանի քաղաքապետի 2004 թվականի մայիսի 11-ի 799-Ա որոշմամբ՝ Մալաթիա-Սեբաստիա թաղային համայնքին օգտագործման իրավունքով տրամադրվել է Բաբաջանյան 304 հասցեում գտնվող 8760 քմ մակերեսով «Շողեր» մսուր-մանկապարտեզը՝ իր հողամասով: Համայնքի ավագանու 2004 թվականի սեպտեմբերի 17-ի որոշմամբ՝ օտարվել է «Ա. Խալաթյան վարժարան» ՍՊԸ-ին: Հայցադիմումներ են ներկայացվել Վարչական և Հակակոռուպցիոն դատարաններ:

• 2008 թվականի ապրիլի 16-ի 113-Ա որոշմամբ՝ Մալաթիա-Սեբաստիա համայնքի ավագանին Հողային օրենսգրքի 60-րդ հոդվածի (քաղաքացիներին և իրավաբանական անձանց սեփականության իրավունքով չփոխանցվող հողեր) արգելքի պայմաններում՝ Երևան քաղաքի Ջամբուլի 29 և 29/3 հասցեում գտնվող 0.515193 հա հողատարածքը տրամադրել է Ա.Հ.-ին: Նախաձեռնված քրեական վարույթի շրջանակում փորձագետի եզրակացությամբ հաստատվել է, որ վերոնշյալ հողատարածքը նախատեսված է եղել էլեկտրահաղորդիչ գծերի համար: Վարչական դատարանը վարույթ է ընդունել Մալաթիա-Սեբաստիա համայնքի ավագանու 2008 թվականի ապրիլի 16-ի որոշումն անվավեր ճանաչելու, Կադաստրի կոմիտեում կատարված իրավունքի պետական գրանցումներն ու սեղանամատյանի գրառումները վերացնելու պահանջներով հայցադիմումը:

• Շահումյանի շրջանի Հաղթանակի գյուղխորհրդի կողմից 1990 թվականի հունիսի 13-ին և 1997 թվականի հոկտեմբերի 24-ին Հաղթանակ թաղամասում որոշ հողօգտագործողների տրամադրվել են հողի սեփականության իրավունքի պետական ակտեր՝ վավերացված «ՀԱՅԱՍՏԱՆ ԵՐԵՎԱՆԻ ՄԱԼԱԹԻԱ-ՍԵԲԱՍՏԻԱ ԹԱՂ. ՀԱՄԱՅՆՔԻ Փ. Բ. Ը.» կնիքով: Մալաթիա-Սեբաստիա թաղային համայնքը «փակ բաժնետիրական ընկերության» կազմակերպաիրավական ձև չի ունեցել և չէր կարող պարունակել «ՓԲԸ» գրառումը: 2022 թվականին հողօգատգործողները սեփականության իրավունքի պետական ակտերը ներկայացրել են Երևանի քաղաքապետարան: 2023 թվականի հունիսի 23-ին Երևան քաղաքի Մալաթիա-Սեբաստիա վարչական շրջանի դատախազությունը հայցադիմում է ներկայացրել Վարչական դատարան: